Rejissyor filmlari buyurtma ekanini tan oldi

«Gumrohlar», «Aldangan ayol», «Ajal jodusi», «Odnoklassniki» kabi bugungi hukumatning mafkuraviy talablariga javob beradigan filmlar rejissyori Hilol Nasimov bu kabi kartinalarni maxsus buyurtma asosida olganini ochiqchasiga tan oldi.

«Adolat ko‘zgusi» gazetasiga intervyu bergan rejissyor suratga olgan filmlarining voqealari «hayotiy voqelikka asoslangani»ni iddao qilgan.

«Bir necha yillar oldin men internet tarmog‘i orqali foydalanuvchilar ongiga buzg‘unchi g‘oyalar singdirilayotgani va filmda buni fosh etishimiz kerakligi haqida topshiriq oldim», deydi H.Nasimov.

«Gumrohlar»dagi gumrohlar esa Vatanimiz mustaqillikka erishgan vaqtlarda iqtisodiy qiyinchilik yuz berganida yurtidan qochib, turli fisqu fasod gaplar bilan o‘z o‘lkasiga tosh otib, endi Vatan gadosi bo‘lib yurgan insonlar haqida… Har narsadan kir qidirib, ayb axtargandan yurtimizda bo‘layotgan tub o‘zgarishlarni tan ola bilish ham kerak», deya gapini davom ettirgan rejissyor.

H.Nasimov O‘zbekistonning «qadrini bilmaganlar oxir-oqibat ko‘r bo‘lishi»ni bashorat qiladi va «Vatanimizning kelajagi buyukligini, har kuni bo‘layotgan ijobiy islohotlar, bunyodkorlik ishlari, yuksalishlarni ochib berish» rejissyorlarning vazifasi ekanini ta'kidlaydi.

Eltuz.com