“Avtomobil qiroli” qanday qilib kelajakka parvoz qildi

Kino ko‘rishni sevaman. Ayniqsa fantastik tragikomediya janridagi kinolarni. Kecha Roman Artemev suratga olgan “Chelovek iz buduщego” degan kinoni ko‘rdim. Kinoni mazmunini gapirib kino bozorini kasod qilish ishtiyoqim yo‘q. Faqat kino sloganini aytaman xolos. Kino «Vse oshibayutsya i eto normalno!» (Barcha yanglishadi va bu odatiy xol) degan shior ustiga qurilgan.

Qizig‘i shundaki, “Barcha yanglishadi va bu odatiy xol” degan gapni Bosh vazir o‘rinbosari Ulug‘bek Ro‘ziqulov avtosanoatga oid nashrlardan birida ishlaydigan jurnalist og‘aynimga aytibdi.

Og‘aynimning aytishicha, Bosh vazir o‘rinbosari 104 million ikki yuzming AQSh dollari miqdoridagi sarmoya “uxlatilganini“ yanglishish deb bilibdi.

Har xolda GM Uzbekistan 2016 yil may oyida yangi Chevrolet Aveo modelini ishlab chiqarishni boshlashi lozim edi, ammo mashina chiqmadi.

Yangi T250 platforma asosida yasaladigan avtomobil ishlab chiqarishni yo‘lga qo‘yish uchun korxonaga kiritilgan 104,2 mln dollar investitsiya offshordagi “kissa” ga ketgani tipratikonga ham ayon.

Ammo tergovchilar savolnomalarini detektiv roman kabi o‘qiyotgan Ro‘ziqulov “baloning o‘qiday” ishlab yuribdi deydi og‘aynim.

O‘zbekiston telekanali esa 11 may kuni kelajakdagi Ro‘ziqulovni namoyish qildi.

Ro‘ziqulov 14 mayda (?) ochilgan ekoforumda nutq so‘zladi.

Texnika mo‘'jizasini ko‘rganmiz, bitta mashinaning ikki marta sotilganini ham tushunamiz, ammo qanday qilib 14 may kungi tadbirda 5 kun oldin qatnashish mumkinligini anglashga tafakkurimiz ojizlik qildi.

Nima ham derdik «Vse oshibayutsya i eto normalno!»

Ali Qushchi,
Eltuz.com