Istanbul hujumida o‘lgan ikki nafar o‘zbek dafn etildi

Turkiya aeroportida 28 iyun kechasi uyushtirilgan bombali hujum paytida halok bo‘lgan namanganlik Abrorjon Ustaboev va toshkentlik Muxiddinov Samad Murodovichlar juma kuni dafn etildi.

22 yoshli O‘zbekiston fuqarosi Abrorjon Ustaboev aeroportga kelib tushishi bilan portlash sodir bo‘lgan va u o‘sha joyda yuragidan o‘q yeb, jon bergan.

Namanganlik Abrorjon Ustaboevning portlash paytida aeroport ichkarisida bo‘lgani va o‘limidan atigi 20 daqiqa oldin telefon orqali yaqinlari bilan gaplashgani aytiladi.

Eltuz.com jurnalisti shuningdek, Turkiyadagi mehmonxonada qo‘riqchi bo‘lib ishlagan toshkentlik Samad Muhiddinovning yaqinlari bilan bog‘langanishga va uning ham juma kuni dafn etilganini aniqlashga muvaffaq bo‘ldi.

Shuningdek Toshkentda Samad Muhiddinovning onasi, xotini Dilnoza va ikki nafar yosh farzandlari qolgan.

Portlash va otishmada yarador bo‘lgan o‘zbeklar soni 4 nafar ekani ham bildirilgandi. Istanbul hujumida yaralangan o‘zbekistonlik 4 kishidan birining ismi-sharifi Rifat Salimov ekani haqida Qirg‘iziston Tashqi ishlar vazirligi ma'lumot tarqatdi.

So‘nggi ma'lumotlarga ko‘ra, terakt oqibatida 44 kishi halok bo‘lgan, 230dan ziyod kishi jarohatlangan.

Eltuz.com