Baxrom Hamroev ozod etildi!

Moskvadagi “Fuqaroviy ko‘mak” tashkiloti rahbari Bahrom Hamroevning Moskvadagi uyiga qo‘ng‘iroq qilgan eltuz.com nashri muxbiri, uning turmush o‘rtog‘i bilan gaplashib, FSB Boshqarmasi tergovxonasidan qo‘yib yuborilgani tasdig‘ini oldi.

«Uni qo‘yib yuborishdi, hozirgina tashqariga chiqqan edilar», dedi huquq faolining ayoli.

Ertalab FSB xodimlari tomonidan olib ketilgan Baxrom Hamroevning hozircha, ekstraditsiya qilinganlarni ozod etish harakatlari bo‘yicha guvoh sifatida so‘roqqa tutilgani va ish hali yopilmagani ma'lum.

Bugun tong saharda Rossiya huquq-tartibot organlari xodimlari kelib uning uyida tintuv o‘tkazishgan va uni olib ketishgan edi. Shuningdek, Eltuz.com nashriga ma'lum bo‘lishicha, tintuv payti olib ketilgan materiallar va kompyuter jihozlari hali Hamroevga qaytarib berilmagan.

Turli diniy ayblovlar bilan ta'qibga olingan shaxslar himoyasi bilan tanilgan Bahrom Hamroev 1992 yildan buyon Rossiyada inson huquqlari himoyasi bilan shug‘ullanib keladi.

Keyingi yillarda unga va uning maslakdoshlari bo‘lgan Rossiyadagi boshqa huquq faollariga hurujlar kuchaygani kuzatilmoqda.

Eltuz.com