Ketmonov o‘ziga ovoz berdi

4 dekabr kungi saylovda qatnashgan Xalq Demokratik Partiyasidan nomzod Xatamjon Ketmonov saylovda qatnashib o‘ziga ovoz berganini matbuotga aytdi.

«Adolat» partiyasining vakili Narimon Umarov ham o‘ziga ovoz berganini bildirdi.

Faqat Milliy Tiklanish partiyasining nomzodi bu savolni ochiq qoldirdi.

Saylovda Bosh vazir nomzodi uchun kurashayotgan O‘zLiDYeP partiyasi faollaridan tashqari, unga muqobil nomzodni ilgari surgan boshqa partiya vakillari ham Shavkat Mirziyoev nomzodi targ‘iboti bilan shug‘ullanishgani ma'lum bo‘ldi.

«Milliy tiklanish» partiyasining faollaridan biri shoira Salomat Vafo ham Shavkat Mirzieevga ovoz berganini oshkora qildi.

Ijtimoiy tarmoqda saylov kuni xitga aylangan videotasvirlar paydo bo‘ldi. Bunda bir gurux ayollar, jo‘shqin bir qo‘shiq motiviga raqsga tushishadi. Bu video qaerda va qachon olingani bizga ma'lum emas, biroq bayram qilayotgan ayollar raqsi fonida kuylayotgan o‘zbek xonandasi qo‘shig‘i satrlari juda ta'sirli.

Ochilar ekan tosh, yorilar ekan bosh
Yolg‘iz hiyonatning dastidan
Yolg‘oni bo‘lib fosh, ko‘zimdan oqar yosh
Yolg‘iz hiyonatning dastidan
Faqat uni saylab, hammadan avaylab
Juda-juda qattiq adashdim
Oqardi sochim, yorildi boshim
Juda-juda qattiq adash-di-im!

Ijtimoiy tarmoqda shuningdek, xalq orasida kriminal avtoritet sifatida tanilgan O‘zbekiston Milliy sport kurashi federatsiyasi prezidenti  Salim Abduvalievning Shavkat Mirziyoev aksi tushirilgan futbolka kiygan rasmlari paydo bo‘ldi.

Saylov uchastkalari yaqinida Shavkat Mirziyoev rasmi va uning tagida qora harflar bilan «Moy prezident» degan yozuv yozilgan oq futbolkalar sotilgan.

Uchastkalarda, saylovchilarga shuningdek gul va konstitutsiya tarqatilgani ham Shavkat Mirziyoevning qay yo‘l bilan hukumat tepasiga kelganini esga soladi.

Eslatib o‘tamiz, xalqaro tamoyillarga ko‘ra, mamlakatda erkin matbuot va real siyosiy muxolifat bo‘lgan taqdirdagina saylovlar erkin va adolatli o‘tgan hisoblanadi…

Videoning Youtube kanalidagi linki: https://youtu.be/TcTiAIeuS9I
Eltuz.com