Zanjirband Akbar – Toshkentdan qo‘rqar

O‘tgan hafta Kiev sudi Islom Karimovning bevasi Tat'yana Karimovaning jiyani Akbarali Abdullaevni O‘zbekiston Bosh prokuraturasining ekstraditsiya talabi bilan bir yilgacha qamoqda saqlash haqida qaror chiqardi.

33 yashar Akbarali Abdullaev O‘zbekistonda jami 400 million dollarga yaqin mablag‘ni noqonuniy o‘zlashtirishda ayblanmoqda.

Akbarali Abdullaevning o‘zi, ayni ayblovlar bilan O‘zbekistonda allaqachon jazolanib, ikki yarim yil qamoqda o‘tirib chiqqanini aytdi.

U O‘zbekistonga ekstraditsiya qilsalar, xavfsizlik kuchlari uni qiynoqqa solib, o‘ldirishlari muqarrarligini aytdi.

Akbarali Abdullaev, 2014 yil qamoqqa olingunga qadar, O‘zbekistonda ko‘plab yirik shirkatlarga egalik qilardi.

2014 yili u yuzlab million dollar pulni o‘zlashtirishda ayblanib, 15 yilga qamalgan edi.

Oradan ikki yil o‘tar-o‘tmas uch marta amnistiyaga tushgan Abdullaev ozodlikka chiqarildi.

Biroq, 2 sentyabrda, Islom Karimov vafot etishidan ko‘p o‘tmay, O‘zbekistonni tark etdi.

15 noyabrda O‘zbekiston Bosh prokuraturasi ayni ayblovlar bilan Akbar Abdullaevga qarshi yangi jinoiy ish ochdi va Interpol orqali qidiruvga berdi.

14 yanvarda Kiev aeroportiga xususiy samolyotda qo‘ngan Abdullaev hisbga olindi.

Rassom Tuz
Eltuz.com