Catira
17 fevral 2020

Oltinsoyda kim kimni urdi?

Joriy yilning 15 fevral kuni o‘zbek ijtimoiy mediasi IIB xodimlari va aholi o‘rtasida to‘qnashuv sodir bo‘lgani haqidagi videolar muhokamasiga to‘la bo‘ldi.

Tasvirlarda Surxondaryo viloyatining Oltinsoy tumanidagi Xalqobod mahallasi ahli va IIB xodimlari o‘rtasida to‘qnashuv sodir bo‘lgani aks etgan.

Voqea guvohlarining tarmoqdagi iddaolariga ko‘ra, tuman IIB boshlig‘i ham norozilarni do‘pposlagan.

To‘qnashuv aks etgan videodan skrinshot

Surxondaryo viloyati Ichki ishlar boshqarmasi matbuot xizmati esa mahalla aholisi huquq-tartibot idoralari xodimlariga tayoq, bolta, belkurak va tosh bilan hujum qilgani va oqibatda ikki nafar xodimi yaralanganini ma'lum qildi.

Mazkur voqeaga munosabat bildirgan Bosh prokuratura noqonuniy qurilgan uy-joylar «Oqoltin manzarasi» fermer xo‘jaligiga qarashli paxta va g‘allaga mo‘ljallangan ekin yer maydonining jami 0,39 gektarida ekanligini, 6 nafar fuqaro yerni noqonuniy egallab, 235,35 kvadrat metr maydonda yashash imkoniyati mavjud bo‘lmagan uy-joy qurib olganini yozgan edi.

Bosh prokuratura Surxondaryoda aholi uylari buzilishi ustida chiqqan janjalda ichki ishlar bo‘limining 2 xodimi va 1 fuqaro jarohatlanganini ma'lum qildi.

Bayonot mazmunidan 14 fevral kungi janjal uchun mas'uliyat «noqonuniy qurilgan» uy-joyi buzilishiga qarshi chiqqan oilalarga yuklangani tushuniladi:

“2020 yil 14 fevral kuni ishchi guruh a'zolari yuqorida ko‘rsatilgan manzilga borib ko‘rilganida, 3 nafar fuqaro o‘zboshimchalik bilan qurilgan uyga yashash imkoniyati mavjud bo‘lmagan bo‘lsa-da, ko‘chib kirib olganligi aniqlangan. Ishchi guruh tomonidan noqonuniy qurilgan uy-joylarni buzib olishlari tushuntirilganida, avvaldan to‘planib turgan fuqarolar hokimiyat vakili va IIB xodimlariga qarshilik ko‘rsatishgan”.

Jurnalist Ibrat Safo o‘zining FBdagi sahifasida Oltinsoydagi qonli to‘qnashuv haqida Bosh prokuratura tarqatgan izohni qanday tushunganini tasvirlaydi.

“Hokim, prokuror va melisalar juda muloyim amakilar, odamga o‘xshab tushuntirib iltimos qilishgan. Ularga choy-poy ham taklif qilinmagan.

Bu fermer xo‘jaligida qurilgan uylar shu to‘qnashuv bo‘lishidan bir kun oldin tap etib osmondan tushgan. Ichidagi odamlari bilan. Yerda yotgan do‘ppili boboy aslida Marsdan kelgan.

To‘qnashuv aks etgan videodan skrinshot

To‘qnashuvda qonga belangan oddiy fuqaro kasalxonaga yotqizilgan. Bitta melisa esa “engil tan jarohati” olgan. Bechora melisa. Boshi yorilgan kishi esa undan muloyimgina o‘z sayyorasiga surish so‘ralayotgan payti shaytonlab o‘zini urib qonatgan, shekilli.

Bu muloyim amakilar odamlarga uy qurish uchun boshqa yer berilishini, iqtibos keltiraman, “va'da qilishgan”. Va'da. Shartnoma yo qaror emas, va'da. (Agar ular yerni noqonuniy egallab olgan bo‘lsa, nega ularga boshqa yer va'da qilinyapti?)

Yerni ularga kimdir sotganmi, kim sotgani, qanchaga, qachon – ma'lumot yo‘q, chunki hali aytganimdek, bu uylar kecha osmondan tushgan.

Prezident unumdor yerlarni qattiq nazorat ostiga olishni buyuribdi. Unumdor yerlarda yashayotgan odamlarning ota-onasini sudrab, ko‘tiga tepib chiqarilsin, degan joyi ko‘rinmadi qarorda.

Osmondan tushgan uylar turgan fermer xo‘jaligining nomi “Oqoltin manzarasi” ekan… Mana oq oltin manzarasi. Balki endi “Qora qon manzarasi”ga o‘zgartirilar».

O‘zbekistonda uylar buzilishi bilan bog‘liq noroziliklar bundan oldin Xorazm va Qashqadaryoda ham yuz bergan edi.

Eltuz.com

Tag‘in o‘qing
10 yanvar 2019
Bekobodlik nashavandning «qiynalib yetishtirgan nasha o‘simligi»ni IIB xodimlari olib qo‘yishgani haqidagi prezident qabulxonasiga 2019 yil 5 yanvarda jo‘natilgan shikoyati ...
16 iyun 2016
Pilla qurti boqish turli tashkilotlar, tibbiyot va ta'lim muassasalari qatorida fermer xo‘jaliklari uchun ham qo‘shimcha majburiyatdir.  Quyida bir fermer ...
17 fevral 2016
Kuni kecha bir qator OAV tomonidan, Aramais Avakyan ishi bo‘yicha yashirincha xukm chiqarilgani, va ushbu jinoiy ish ayblanuvchilari 14 ...
30 may 2022
Erkin Vohidov 2016 yilning 30 mayida 79 yoshida vafot etdi. U 1936 yil 28 dekabrda Farg‘ona viloyati Oltiariq tumanida ...
Bloglar
26 noyabr 2022
Nukusdagi voqealarni o‘rganish bo‘yicha parlament komissiyasi taklifi va Qoraqalpog‘iston Jo‘qorg‘i Kengesi iltimosnomasiga ko‘ra, namoyishlarda qatnashib ...
3 noyabr 2022
1906 yilning 3 noyabrida Germaniyaning Berlin shahrida o‘tgan Xalqaro radiotelegrafiya anjumanida SOS signali halokatni bildiruvchi ...
1 noyabr 2022
Ulug‘ o‘zbek shoiri va muholifat lideri Muhammad Solih bilan suhbatning 11-qismi Turk birligi g‘oyasi va ...