Sheralini o‘n yilga qamatgan ayol kasalmi? (video)

1 dekabr kuni Toshkent shahri sudida odam savdosida ayblanib, 10 yilga qamalgan 28 yashar Sherali Mahmudov shikoyati bo‘yicha appelyatsiya sudi boshlandi.

Da'vogar, toshkentlik 37 yashar Sevara G‘ulomova tomonidan sudda hech kim qatnashmagan, biroq appelyatsiya hay'ati ayblanuvchi tomon Sherali Mahmudovning keltirgan dalillarni tinglagan.

G‘ulomova Istanbulning Bojilar mahallasida 2016 yil oxirida 3 oy jinsiy qullikda ushlaganini aytib Mahmudovni sudga bergan, 17 oktyabr kuni Mahmudov 10 yil muddatga ozodlikdan mahrum qilingan edi.

Appelyatsiya shikoyatiga ko‘ra, sud ayblov tomoni da'vosiga tayanib, dalil va hujjatlarni chuqur o‘rganmasdan Mahmudovga nisbatan asossiz hukm chiqargan.

Sergeli tumani sudyasi Muzaffar Qo‘qiev 17 oktyabrda chiqargan hukmda Mahmudov Jinoyat kodeksining 135-moddasi bo‘yicha, ya'ni odam savdosida ayblangan.

Mahmudov «bachadon saratonidan davolanish uchun Turkiyaga borgan Sevara G‘ulomovani fohishalikka majburlaganligi» aytiladi, jumladan, sud hukmida.

«Eltuz» muxbiri bilan gaplashgan tekstil fabrikasi xodimlari Mahmudovning «odam savdosi» yoki «fohishafurushlik»ka hech bir aloqasi yo‘qligini aytishdi.

«Eltuz» nashrining Turkiyada o‘tkazgan surishtiruvi voqeaning ko‘proq oilaviy mojaroga yaqinligini ko‘rsatmoqda.

Mahmudovning yaqinlari «Eltuz»ga davogarning «o‘ynashi» bo‘lgan Alisherni rashk qilib, uning ukasi Sheralidan qasd olganini bildirishmoqda.

G‘ulomovaga tegishli ekani aytiladigan, davogarning yaqinlariga jo‘natilgan SMSlarda ham uning jazmanidan qasd olganiga ochiq ishoralar bor.

Shuningdek, mahkum tomoniga ko‘ra, ayolning Turkiyaga bachadon saratonidan davolanishga borgani haqidagi iddaosi ham yolg‘on.

U sudga taqdim qilgan hujjat faqat shaxsning tekshiruvdan o‘tganligi haqida ma'lumotnoma bo‘lib, bu kasallik tashxisi emas.

«Eltuz» nashrining Turkiyadagi onkologiya kasalxonasidan olgan hujjatda ham G‘ulomovaning Turkiyada davolanmaganligi aytiladi.

Sudning keyingi majlisi 12 dekabrga belgilandi. «Eltuz» nashri voqealar rivojini kuzatishda davom etadi.

Eltuz.com