Milliy gvardiya jinoyat olamidan qasos oldi

Milliy gvardiya o‘z xodimlariga qilingan hujumlar uchun jinoyat olamidan qasos olgani aytilmoqda.

Salom Qadrli muxlislar bugun 29 noyabr  Eltuz o‘zining kundalik ko‘rsatuvlarini davom ettiradi.

Eltuzning ichki ishlardagi manbalariga ko‘ra, kecha butun O‘zbekiston bo‘ylab jinoyat olami vakillarining ommaviy ravishda hibsga olinganiga 26 noyabrda olti nafar Milliy Gvardiyachilarning pichoqlangani sabab bo‘lgan.

O‘sha kuni Tashkentda olomon qozog‘istonlik reper Jah Khaliba – ning Humo Arenasida bo‘lib o‘tgan kontsertiga kira olmagan va orada katta izdihom paydo bo‘lgan edi.

Huquq tartibot organlari vaziyatni nazoratga olishga urinishar ekan, noma'lum shaxslar ulardan olti nafarini pichoqlab ketganlar.

Milliy Gvardiyachilar turli darajada tan jarohati olganlar.

Ichki ishlardagi Eltuz manbalari bergan bu xabarni mustaqil manbalar orqali tasdiqlatib olishning imkoni yo‘q.

Pichoqvozlarning jinoyat olami vakillariga aloqadorligi aytilgan, ammo ularning birortasi ham hozirgacha hisbga olinmagan.

Eltuz manbalari, ko‘cha avtoritetlarining hibsga olinishi Milliy Gvardiyachilar uchun qasos amali deb aytmoqdalar.

Bir biridan mustaqil Eltuz manbalarining aytishicha, kecha 28 noyabr kechki 19 larga yaqin O‘zbekistondagi yagona “vor v zakone” Baxti Tashkentskiy laqabli Baxtiyor Qudratillaev huquq tartibot idoralari xodimlari tomonidan hibsga olindi.

Yuqori rutbali bir necha zobit 52 yashar Baxti Tashkentskiyning Grand Mir mehmonxonasi orqasida joylashgan domdagi kvartirasidan “marhamat qilib, biz bilan birga kelishingizga to‘g‘ri keladi,” deya olib ketganlar.  

Avvalroq esa Salim Abduvalievga yaqin “Saidaziz medgorodok” laqabli kriminal avtoritet Saidaziz Saidalievni va uning yonida bo‘lgan yana to‘rt kishini “maski shou” qilib hibsga olganlar. Hibsga olish jarayonida Saidaziz va uning yigitlari qarshilik ko‘rsatganlar va natijada qattiq kaltaklangan. Qo‘lga olish amaliyoti paytida “Saidaziz Medgorodok”ning boshi yorilgan.

Bundan tashqari G‘ofir Rahimovga yaqin deb ko‘rilgan “Zavxoz” laqabli jinoiy avtoritet Bahodir Sultonov ham hibsga olingan.

Eltuz manbalariga ko‘ra, Bahodir Sultonovni ham “erda sudrab olib borib mashinaga tiqqanlar”.

Shuningdek Toshkentning eski shahar qismidan bo‘lgan “Ziki eski shahar” laqabli kriminal avtoritet ushlangan.

Eltuz manbalarining aytishicha, O‘zbekiston bo‘ylab ja'mi 200 dan ortiq “blatnoylar” qamoqqa olingan.

Ular IIB va IIV binolari yerto‘lasiga olib borib qamab qo‘yilmoqda.

Jinoyat olami vakillarini ushlash amaliyoti huquq tartibot organlarining qo‘shma amaliyoti deya baholanmoqda.

Eltuz manbalarining taxmin qilishlaricha, oxirgi yillarda kuzatilmagan keng ko‘lamli bunday amaliyotni o‘tkazishga O‘zbekiston oliy rahbariyati tomonidan buyruq berilgan bo‘lishi mumkin.

Eltuz voqealar rivojini kuzatishda davom etadi. Kanalimizga obuna bo‘lishni, videolarimizga layk bosishni unutmang.