DXX izolyatoridan navoiylik yirik tadbirkor jasadi chiqdi

26 aprel kuni Samarqanddagi DXX tergov izolyatoridan navoiylik ko‘zga ko‘ringan tadbirkor, 56 yashar Azamat Xalikovning jasadi chiqdi.                            

Shu oy o‘rtalarida DXX xodimlari tomonidan hibsga olingan Azamat Xalikov Navoiy viloyatidagi eng yirik qurilish shirkati – «Temur Malik» MChJga rahbarlik qilgan.

Uning nimada gumon qilinib hibsga olingani va tergov tafsilotlari Eltuzga ma'lum emas.                             

Marhumning janozasi bugun, 27 aprel kuni o‘zi istiqomat qilgan Qiziltepa tumani Oqsoch MFY Urganji qishlog‘ida o‘qildi.

Azamat Xoliqov rahbarlik qilgan MChJda 4500 nafar odam ishlagan.                                                     

Azamat Xoliqov – shu kunlarda ham Navoiy viloyatida bo‘lib turgan DXX tezkor guruhi hibsga olgan shaxslardan faqat bittasi ekani iddao qilinmoqda.

Eltuz manbasining aytishicha, tezkor guruhga Xoliqov va boshqa tadbirkorlardan Navoiy viloyati rahbariyati va viloyatdagi yirik korxonalar, xususan Navoiy NGMK rahbariyatiga qarshi ko‘rsatmalar olish topshirig‘i berilgan. 

Eltuz manbasi keltirayotgan ismlar orasida shaxsan NGMK rahbari, O‘zbekiston Qahramoni, senator Quvondiq Sanaqulov ham bor.

Rasmiylar hulosasiga ko‘ra, Xoliqov yurak huruji bois o‘lgani bildirilmoqda. Eltuz Xoliqovning o‘limi hamda DXX tomonidan o‘tkazilayotgan reydlar tafsilotini o‘rganmoqda.

Tahririyat bu borada barcha tomonlar uchun ochiq.