Сас
4 ноябр 2015

Мухлисларни лол қилган ашула

Қудрат Бобожон
Eltuz.com

Абдулазиз Каримнинг янги “Ғариб оғоч” ашуласини тингларкан қандайдир кайфият мени ҳеч тарк этмади, на қўлим ишга борди, на ёзишга. Кун бўйи такрор ва такрор тингладим. Бугун сал ўзимга келдим

Айни пайтда эса фейсбукдаги гуруҳларда ашула қизғин гап сўзларни ҳам қўзғай бошлади. Бунинг бир сабаби ашуланинг Муҳаммад Солиҳ шеърига басталанганида.

“Албатта ашуламнинг яхши чиқишига асосий сабаб матн бўлди. Солиҳ ака масаллиғини бердилар, мен эса пишириб бердим ҳолос”, – дейди мен билан суҳбатда хонанда оддийгина қилиб.

Абдулазиз Карим қўшиқ чиқишидан ўн кун илгари бу ҳақда фейсбукдаги саҳифасида хабар қолдирган ва унинг яқин мухлислари буни шодлик изҳорлари билан қаршилаганди.

Бугун эса улар ҳам қўшиқни эшитиб том маънода “лол” қолишди – шеър матни муаллифи ким эканлигини билишганларидан сўнг…

“Ўзбекистондагилар қўшиқни эшитиб жииииим булиб ўтиришибди. Нечтаси бугуннинг ўзида мени дўстлар сафидан ўчириб юборибди”, – дея ёзади хонанда менга ёзган чатида.

Лекин ҳамма ҳам ашулани жимгина тинглаб ўтиришгани йўқ, айниқса илгари хонандага мухлис бўлмаганлар.

“Ажойиб! Бўлар экану. Абулазиз Каримга ижодий баркамоллик тилайман!”

“Бу шеър ҳудди Абдулазиз Карим ижро этишига бағишлаб ёзилгандай, ажойиб! Маза қилиб тинглаяпман!”

“Гап йўқ! Яхши композиция!!!”

“Xoфизлардан чиққан халқпарвар экансиз. Ижодингизга парвозлар тилайман”

Булар социал тармоқлардаги мақтовларнинг бир қисми.

Бироқ, ашулачига заҳрини сочишга тайёрлар ҳам анчагина экан.

Кимлардир хонанданинг бир вақтлар ўзбек мафияси ёнида бўлганию, энди мухолифат лидери атрофида пайдо бўлганини киноя остига олади, бошқаси эса қўшиқ қийматини пулга чақиб, “Бир тийинга қиммат” дейишдан нарига ўта олмайди.

Бошқа бировлар эса шунчаки Абдулазиздан мутлақо бошқача қўшиқ кутганини билдиради.

“Менга ёқмади. Бу мен севиб ўқийдиган шеър эди. Бир йил ичида шу қўшиқни бошқача қилиб тайёрлайман”, – дея ёзади яна бир фейсбукдош.

Хуллас ашула Муҳаммад Солиҳ ижодини, ҳаётини ва унинг сиёсатини чуқур билган, юзаки билган ва мутлақо билмаган одамларда турлича таассурот уйғотмоқда.

Масалан ўзим бу шеърни ашула жанрида тасаввур қилмаганман, уни оғир рок жанрига яқин оҳангда ижро этиш мумкин деб ўйлаганман, бошқа дўстларимиз эса сиёсий марш ёки бошқа оҳангларда тасаввур қилишган.

Шеър ўз ички оҳангларига эга, ҳар ким уни ўз ботиний оҳангида ўқийди, мени лол қолдирган нарса эса Абдулазиз ижросида янги оҳангнинг топилгани, унинг ҳеч ким кутмаган шаклда янграганидадир.

Бир замонлар Муҳаммад Солиҳ шеърларини ҳеч ким тушунмагани каби, буни тушуниш қийин, бироқ энди бу оҳангларни тинглаш мумкин…

Баъзан кўзда ёш билан… мен каби.

Тағин ўқинг
19 апрел 2019
“Чегарасиз мухбирлар” (RSF) ташкилоти 2019 йил учун йиллик Матбуот эркинлиги индексини эълон қилди. Бу индексга кўра, Ўзбекистон 180 давлат ...
21 январ 2019
Zeromax компаниясининг собиқ раҳбари Миродил Жалоловнинг озодликка чиқарилиши Ўзбекистон президенти Шавкат Мирзиёевнинг Германияга расмий ташрифига боғлиқ бўлиши мумкин. Мазкур ...
21 май 2019
Андрей Сахаров 1921 йилнинг 21 майида Москвада туғилди. Водород бомбасини ихтиро қилган, интернет келажаги ҳақидаги гипотезани илгари сурган Сахаров ...
23 июл 2018
Пойтахтнинг Олмазор тумани судида 51 ёшли тадбиркор, “Интеграл Инвест” ширкати раҳбари Жаҳонгир Умаров устидан маҳкама 23 июль куни ҳам ...
Блоглар
17 феврал 2020
Ўзбекистонда тобора оммавийлик касб этаётган, “президент ташаббуси” билан ташкил этилаётган кластерлар пахтани қўшиб ёзишнинг олдинги ...
13 феврал 2020
Сиёсатшунос Рафиқ Сайфулин Ислом Каримов режимининг етакчи тарғиботчиларидан бири эди. Бугун у ватанга хоинликда айбланяпти.  ...
6 феврал 2020
Марказий Осиё давлатларига паст назар билан қарашини яширмайдиган Россия либерал демократик партияси лидери Владимир Жириновский ...