Асосий мавзулар
9 август 2023

Тошкентда сомонхона – Қашқадарёда трансформатор ёнди – ЭП90

Салом қадрли мухлислар. Элтуз порталига келган сўнгги бешта мактубни ўқиймиз. Улар Ўзбекистоннинг Бухоро, Самарқанд, Тошкент ва Қашқадарё вилоятларидан келган.

Дастлабки мактуб Бухородан. Мактуб эгалари ҳусусий ўқув маркази ёшларни мажбурий меҳнатга жалб қилганини иддао қилмоқда.

«Бухоро вилояти Қоракўл туманидан ёзмоқдамиз. “Каракўл Эдюкейшн” номли хусусий ўқув маркази маъмурияти билим олиш учун келган ёшларни мажбурий меҳнатга жалб қилди. Турли ҳудудлардан келган болаларни мажбурий ишлатиш қонунга зид эмасми? Болаларни калтаклаш ҳолати ҳам бор деган гаплар юрибди. Мутасаддилар текшириб, тегишли чора кўришини сўраймиз».

Кейинги шикоят Зангиота туманидан. Мактуб эгаси Ориент Финанс банк филиалидаги ҳолатдан шикоят қилмоқда.

«Ассалому алайкум Ориент Финанс Банк Зангиота филиалидаги аҳвол. 3 та кассадан 1 таси ишлаяпти. 1 соат бўлди келганимга. Кредит тўлолмаяпман», дея ёзади банк мижози.

Кейинги мактуб Тошкент вилоятининг Оққўрғон туманидан, ёнғиндан жабр кўрган хонадон эгаси дарахтлари, молхона ва сомонхонаси ёниб кетганини айтмоқда  

«Тошкент вилояти Оққўрғон туманидаги фермер хўжалигида ёнғин  рўй берган. Бунга эса буғдойдан бўшаган ерга ўт қўйилгани сабаб бўлган. Ёнғин натижасида кўплаб дарахтлар нобуд бўлди, хонадонлардан бирининг катта молхонаси ва сомон боғлами ёниб кетди. Ер майдонларини ёқиш тақиқланган. Бу ҳам экология, ҳам ёнғин хавфсизлиги талабига зид. Аммо бунга айбдор фермер зарарни қоплаб бермаслигини айтмоқда. Ваколатли идоралардан зарарни ундиришда кўмак сўраймиз».

Қашқадарёда эса бозордаги трансформатор ёниб кетди, мактуб эгаси маҳсулотлари иссиқда айниб қолганини ёзмоқда.

«Қашқадарё вилояти Яккабоғ тумани деҳқон бозоридан мурожаат йўллаяпмиз. Деҳқон бозори ҳудудида дўконлар кўп, лекин уларга атиги битта трансформатор хизмат кўрсатиб келмоқда. У ҳам ҳар йили 4-5 маротаба ёниб кетади. Мана, бир неча кундан буён бозорда чироқ йўқ, маҳсулотларимиз иссиқда айниб қолмоқда.

Бу ҳақда электр энергияси корхонасига мурожаат қилсак, бозор бизга қарамайди дейишди. Бозорда дўконлар шунчалар кўпайиб кетганки, уларга электр энергияси етказиб бериш осон бўлмаяпти (дарвоқе, уларнинг ҳаммаси қонуниймикан?) Оқибатда электр энергияси таъминотида зўриқиш кузатилмоқда. Биз – тадбиркорлар, бозоримизда бир эмас, бир нечта трансформатор ўрнатишларини сўраймиз».

Ва ниҳоят сўнгги мактуб Самарқанд вилоятининг Каттақўрғон туманидан. У ерда ариқ тўсиб қўйилгани боис сувсизликдан аҳолининг экинлари қуримоқда.

«Самарқанд вилояти Каттақўрғон туманидаги “Олтинчи бригада” аҳолиси номидан ёзмоқдамиз. Бизга келадиган ариқ  тенг иккига бўлинади: 5 ва 6-бригадага. Олдиндан шундай бўлиб келган. Аммо “Бешинчи бригада”да  жойлашган фермер бизга келадиган ариқни катта бетон бўлаги билан тўсиб, сувни ўтказмаяпти. Бу масалада ҳокимиятга ҳам бордик, лекин фойдаси бўлмади.  Фермер аслида пахта даласини томчилатиб суғориши керак эди. Аҳоли экинлари қуримоқда. Бу ёқда солиқ ҳам тўлашимиз керак. Сув таъминотини тиклаб беришларини илтимос қиламиз. Дея ёзади сувсизликдан қийналаётган Каттақўрғоннинг олтинчи бригадаси турғунлари».

Бу сизга бугун ўқиб эшиттирганимиз бешта шикоятнинг сўнггиси эди. Кўрсатувимизга келаётган изохларда кўпинча биз билан қандай боғланиш. Қандай қилиб бизга мурожаат қилиш мумкинлиги тўғрисида сўрашади. Билмаганлар учун яна бир бор эслатамиз. элтуз портали интерактив тарзда телеграм каналида алоҳида саҳифа шаклида очилган. Мурожаатлар учун у ерга махсус бот ҳам ўрнатилган. Элтуз келаётган шикоятлар, видеомурожаатлар, таклифлар ва уларга ёзилган жавобларни ҳам эътиборингизга тақдим этишга интилади. Кун давомида биз билан қолинг. Каналларимизга обуна бўлинг.  

Eltuz.com

Тағин ўқинг
8 феврал 2017
Наманганлик куёв, айни пайтда тиббиёт кўриги бўлими мижози Ибодулла Бойматов ўзи олган видеони Элтузга жўнатди. «Аршин мололон» киносидаги куëв ...
20 декабр 2023
Мана бу тарихий суратни эслайсизми? «Ҳудудгазтаъминот»нинг кишанланган Тошкент вилоят бўлими бошлиғи Музаффар Алиев. Унинг қўлига кишан солишни кимсан ўша ...
18 сентябр 2017
Уйландингми тамом, бир йилдан кейин фарзанд кўрмасанг «бир балоси бор буларнинг» каби тавқи лаънатни қучоқлайсан. Мана допустим, тасаввур қилинг ...
15 январ 2024
Президент Мирзиёев 12 январ куни Ҳавфсизлик кенгашининг кенгайтирилган йиғилишида ўзбек медияси учун миллий контент яратиш зарурати ҳақида гапирди. «Биз Ўзбекистон ...
Блоглар
11 май 2024
1944 йилнинг 11 майида Сталин барча қрим татарларини Қримдан сургун қилиш ҳақидаги машъум қарорни имзолади. ...
6 май 2024
Ҳайрли кун! Урганч шаҳрида яшайман. Бугун қуйидаги воқеа юз берди: мен автобусда телефонда гаплашиб тургандим. ...
30 апрел 2024
1990 йилнинг 30 апрелида мустақил Ўзбекистон тарихидаги илк демократик партия – «Эрк»нинг таъсис қурултойи бўлиб ...