Cатира
29 апрел 2016

Туя кўрдингми? ёки трамвай….

Ўзбек ҳукумати тепасидагиларга трамвайнинг асло кераги йўқ, ўзбек мулозимининг трамвай ёки велосипед миниши – уни кўчага чиқазиб сазойи қилиш билан баравар.

Трамвайни темир терсакка топшириб озроқ фойда қилиш мумкин. Зотан арзимаган йўлкираси ҳам, депо хизматчиларига ойлик ёзиш ҳам, қоғоз тўлдириш, унинг ишчиларига декрет пули тўлаш, ҳукумат учун бир дардисар. Арава синса ўтин деганларидек, бу масаланинг ечими, чинорларни йўқ қилиш билан донг чиқарган Тошкент ҳокими Раҳмонбек Усмоновга ҳамирдан қил суғурган каби жуда ҳам осон.

Қолаверса, президент кортежи учун йўл очилади, ҳурмати бор коттаконларнинг болалари пойтахт кўчалари бўйлаб мошиналарида дрифт қилишганида, трамвай йўллари ҳалақит бермайди. Бунинг устига, темир йўллар таъмирига ажратилган пуллар ҳам чўнтакка урилади.

Тугатилган трамвай депоси мол мулкларичи? Трамвай бекатларию, идора бинолари, у ердаги жиҳозларни кимошдига қўйиб сотишдан, тўғрироғи уларнинг келишилган эгасидан закалатини олиб пуллаб, фойдасини арра қилиш, йўқсулларнинг улови – трамвайни сақлашдан минг бора афзал.

Нима фойда бўларди, эски темир терсакдан, нари борса, трамвайнинг дўнгалагию, йўлларининг шпали билан рельси ўртамиёна мулозимнинг молхонасига бостирма бўлар, деб ўйларсиз…

Эҳ, бу бостирманинг тагида гап кўп…  Масалан 2012 йили ўз нархидан 4 баравар юқори нархга ҳарид қилинган трамвайлар билан боғлиқ биргина афёранинг ўзини айтмайсизми…

Ўшанда 20 трамвайнинг ҳар бири бир миллиондан олинганди. Албатта, бош вазир Мирзиёв амри, шаҳар ҳокими Усмонов буйруғи билан.

Ўша 20 миллионни ҳоким тўра ўз чўнтагидан берган деб ўйлайсизми. Солиқдан ортган пули ишга трамвайда боришга зўрға етадиган солиқ тўловчилар чўнтагидан албатта. Керак бўлса, энди бугун уларга трамвай ҳам йўқ. Солиқ тўловчи фуқаро энди, сифатсиз бензин сассиғидан бурқсиган, серсоя дараҳтлари қирқиб ташланган кўчада, жазирама иссиқда резина автобусни кутишга мажбур.

Дарвоқе, ҳокимнинг ҳам, бош вазирнинг ҳам, мамлакат президентининг ҳам ойлиги ўша бечоранинг ойлигидан ундирилган солиқлардан таркиб топган.

Лекин бундай ойликка яшаб бўладими?

Зар қадрини заргар билар, чилангар қайдан билар дегандай, ҳеч қачон трамвайда юрмайдиган ҳокимнинг ҳам, вазирнинг ҳам, президентнинг ҳам чўнтаклари иккитадан.

Бири ўша бечора солиқ тўловчи фуқаролардан ундириладиган пул учун бўлса, иккинчиси тахминан 20 та трамвайни арра қилиб, ўзини ҳам изини ҳам йўқ қилиш каби қинғирликлардан тушадиган тушум учун.

Чўнтак катталашган сари унинг эгалари, Панама каби офшор юртларига олиб бориб яшириб ташлаб келишади. Бошқаларнинг чўнтагини қуруқлаш учун, шахсий чўнтак доим қуруқ бўлиши кераклигини трамвай чилангари қайдан билсин?

Билганда ҳам қўлидан нима келарди унинг, бу чўнтакка шаъма қилганлар аллақачон экстремист тамғасини олиб, олис Жаслиқда ўтирганини ҳеч ким билмайди деб ўйлайсизми?

Ҳуллас, трамвай кўрдингми? Йў-ў-ў-қ!…

Рассом Элсевар
Eltuz.com

Тағин ўқинг
8 октябр 2018
Украина ҳукуматининг исталмаган шахслари рўйхатига кирган 43 яшар Артёмий Лебедев Тошкент ҳокимлигидан катта буюртма олди. Россия ишғол қилган Қрим ...
19 сентябр 2016
16 сентябр куни Ўзбекистондаги ЎзЛиДеп партиясидан мамлакат вақтли президенти Шавкат Мирзиёевнинг номзодини илгари сурилганди. Унинг ортидан расмиятчилик учунгина кўрсатиладиган, ...
16 январ 2017
Ўзбекистоннинг марҳум президенти Ислом Каримовнинг Тошкентда уй қамоғида сақланаётган катта қизи яқинда Швейцария прокуратураси томонидан пул ювиш айблови бўйича ...
29 март 2016
26 февраль куни қабул қилинган қарор ижроси шу кунларда вилоятдан Тошкентга келганлар учун жиддий муаммога айланиб улгурди. Гувоҳнома олиш ...
Блоглар
21 сентябр 2020
Аёллар дискриминацияси ва гендер тенгликка қарши ҳаракатлар аввал масжидларда, ички ишлар ходимлари орасида (аёлларни ечинтириб, ...
14 сентябр 2020
Бир танишим бор эди. Ҳозир ўтиб кетган. Икки-уч йилда чорраҳа ёки метро вагонида тўқнаш келиб ...
11 сентябр 2020
“Биз томонларгаям коронавирус инфекция етиб келди. Қишлахта ўн бешта одамда ўша касаллик бор экан”,- деди ...