ЎзТВ Советнинг пахта афсонаси Турсунойни «тирилтирди» (видео)

20 май куни Ўзбекистон телеканалининг Таҳлилнома дастурида совет даври афсонасига айлантирилган аёл – Турсуной Оҳунова ҳаётига бағишланган лавҳани нимойиш қилди.

Ўзбекистонлик таҳлилчи Анвар Назир Элтузга берган интервьюсида буни совет даври ташвиқотининг тирилтирилиши дея баҳолади.

Турсуной Охунова 1937 йил 20 майда туғилган, 1960 йилдан Тошкентдаги Киров номли колхоз бригадири бўлган, 1983 йил вафот этган.

Ўша давр ёшлари учун идеал бўлган, совет афсонасига айлантирилган аёл 1954 йилги пахта мавсумида 20 тонна, кейинги йили 60 тонна, 1959 йилга келиб эса 210 тонна пахта териб топширгани иддао қилинади.

«Бу кўзбўямачилик бўлган, унинг учун бутун бошли бригада пахта терган, ва улар қўлда пахта теришган», дейди Анвар Назир.

Чунки таҳлилчининг сўзларига кўра, ўша даврдаги совет тракторларида бир мавсумда 30 тоннадан ортиқ пахта териш техник жиҳатдан мумкин эмас эди.

Бундан ташқари, таҳлилчининг сўзларига кўра, «Таҳлилнома» дастурига киритилган кўрсатувда Турсуной Охунованинг 46 ёшида фожиали ўлгани айтилмаган.

«Турсуной Охуновани советлар бошини еди – пахта даласига сепилган заҳарли дорилардан саратонга учраб ёш ўлиб кетди» дейди Анвар Назир.

Eltuz.com