Хоразмлик усталар «Запорожец»дан «Феррари» ясашди (видео)

Хоразм вилоятининг Қўшкўпир тумани усталари «Феррари» автомобилининг нусхасини яратишди. Энг қизиғи, унга «Запорожец» автомобили мотори ўрнатилган.

«Элтуз» нашрининг Урганчдаги мобил мухбири хоразмлик усталар яратган «Феррари»ни 11 декабрда тасвирга олишга муваффақ бўлди.

Энг арзон совет автомобили бўлган «Запорожец»ни ишлаб чиқариш 1994 йили тўхтатилган. Нақ 800 от кучига эга бўлган «Феррари» автомобиллари эса «Запорожец»дан фарқли икки ўриндиқли.

Айни пайтда «Феррари» ҳам афсонавий «Запорожец» каби кўплаб латифаларга мавзу бўлган машина.

«Элтуз» мухбири айнан Ferrary русумидаги машиналарни Стокгольмдаги энг қимматбаҳо автомобиллар сотиладиган Dream avto салонида тасвирга олди.

Дўкондаги «Феррари» автомобиллари нархи русумига қараб 300 мингдан 400 минг долларгача баҳоланган.

Масалан, бу йил урф бўлган Ferrary 488 Spiderнинг Стокгольмдаги нархи 365 минг доллар. Бу икки кишилик спорт машинасининг максимал тезлиги соатига 340 километр.

«Элтуз»нинг ўзбекистонлик Ferrary ишқибозлари учун видеога олиш илтимосига Швециядаги дўконда қаршилик бўлмади, бироқ «Запорожец»дан «Феррари» ясаган хоразмлик уста ўзини танитишни истамади.

Айни пайтда Стокгольмдаги автосалон эгаси бу машиналар рекламага муҳтож эмаслигини айтди.

Youtube каналидаги видео: https://youtu.be/3_536x1eUfU

Eltuz.com