Зармитан олтин конида бир лаҳмчи ўлди

Навоий кон-металлургия комбинати акциядорлик жамиятига қарашли “Зармитан” олтин қазиб олиш конида оқибати ўлим билан тугаган бахтсиз ҳодисалар сони яна биттага кўпайди. 

Бу галги фалокат скипли шахта қуриш ишларини амалга ошираётган чех инвесторлари участкасида содир бўлди. 

Ҳавони алмаштириб турувчи вентиляция тизимининг енг қисми узилиб, шахтанинг қуйи қисмида ишлаётган лаҳмчи Рамазон Тоғаевнинг устига қулаб тушган ва  унга оғир тан жароҳати етказган. 

Жабрланувчи зудлик билан шифохонага етказилиши ва тегишли тиббий ёрдам кўрсатилишига қарамай шифохонада жон берган.

Чехиянинг “Майн констракшн альянс” компанияси Тошкентдаги офиси мазкур ҳодиса бўйича баёнот беришдан ўзини олиб қочди. 

Компаниянинг маҳаллий ишчиларни камситувчи шартлар билан ишга қабул қилишга одатланган “Зармитан” конидаги участкаси директори Жамшид Ниёзовнинг айтишича, бахтсиз ҳодиса сабабли вафот этган ишчининг Нурота тумани, Лангар шаҳарчасида яшовчи оиласига моддий ёрдам кўрсатилган.

Тегишли мутасадди ташкилотлар томонидан ҳодиса сабаблари ўрганилмоқда. Элтуз Ўзбекистондан келаётган воқеаларни ёритишда давом этади. Каналимизга обуна бўлинг.