«Ўликнинг табриги-2»

Бугун 31 август куни ЎзА ахборот агентлиги сайтида пайдо бўлган, президент Ислом Каримов номидан йўлланган табрик аллақачон ғойиб бўлди.

«Президент Ислом Каримов Ўзбекистон халқига байрам табригини йўллади» дейилади, соат 13.14 да пайдо бўлган, уни кўчириб босган ва тезгина олиб ташланган «Даракчи» сайтидаги табрик матни табрик индаллосида.

Табрикнинг тўлиқ матни эса ЎзА ахборот агентлиги сайтида эканлиги иқтибос қилинади.

Айни пайтда президентнинг аҳволи ҳамон номаълумлигича қолмоқда, бошсиз қолган мамлакат ҳукумати ўзининг гилам ости ҳаракатлари ҳақида халққа ҳеч бир маълумот сиздирмаяпти.

Бироқ, юқоридаги каби ҳолат кишини сергаклантиради ва беихтиёр салкам бир йил бурун янги йил арафасидаги ғаройиб ҳолатни эсга солади.

Президент байрам табрикларини ўзи ўқимаслиги, уни бошқалар ёзиши ва тағин бошқалар ўқиб бериши кўпчиликка сир эмас…

2015 йил 31 декабр куни ҳам ҳудди шундай бўлди, бироқ табрикни ўқиган ЎзТВ диктори Абдумўмин Ўтбосаров, табрик видеотасвири эфирга кетаëтганида аллақачон ўлиб бўлган эди.

Элтуз манбаларига кўра, Ўтбосаров президентнинг табригини 30 декабр куни ўқиган 31 декабр куни тахминан кундузги соат 11 ларда касалхонага олиб келинган ва ўша ерда инфарктдан жон берган.

Бор гап шу. “Ўликнинг табриги” деган жумлани илк бора 1999 йили мен Бош мухаррир бўлган Урганчдаги Эй Эл Си телекомпанияси ходими Нигора Абдуллаевадан эшитувдим.

Реклама ишларига бош қош бўлган Нигора ўша куни оламдан ўтган маҳаллий депутат ўлими ҳақидаги хабарни эфир сеткасига жойлаштирар экан “Ўликнинг табриги” деган жумлани ишлатди. Зотан эфир сеткасидаги “Табриклар” деган жойга илк бор таъзия эълони қўйилаëтган эди.

Тақдирнинг ҳазили билан, на ўлик, на тириклиги айтилаётган президентнинг навбатдаги табриги қисқа муддат бўлсада омма кўзига чалинди ва тезгина олиб ташланди, бироқ ундан бир скриншот қолди, шуни сиз билан баҳам кўрамиз.

Қудрат Бобожон
Eltuz.com