Асосий мавзулар
29 ноябр 2016

Хорижлик кузатувчилар ўзимизникилардек гапирмоқда

Жаҳон агентлиги, гўёки ҳорижликлар Ўзбекистондаги демократик ўзгаришларга қойил қолишаётгандай шубҳали усулларни қўлламоқда.

Яқиндагина Ўзбекистондаги президент сайлови ҳақида жаҳоннинг нуфузли газеталаридан бирида тижорий мақола чиқариб, кейин уни мазкур нашрнинг бу сайловолди кампанияси демократик ва очиқ-ошкоралик руҳида ўтаётгани тўғрисидаги фикри ўлароқ талқин қилгани учун “Жаҳон” ахборот агентлигининг юзи қизарганди.

Шу жиҳатларини ўйлаганда сайлов тўғрисида “Жаҳон” тайёрлаган, халқаро кузатувчилар фикри ўрин олган мақолалар анча жиддий эътибор талаб қилади шекилли. Чунки бу фикрлар дунёнинг энг демократик ҳисобланадиган давлатлари вакиллари номидан эълон қилинмоқда.

Бу фикрларнинг эътиборни тортадиган жиҳати эса уларнинг ўзбекистонлик депутатлар, ҳукумат косасидан нафсини қондирадиган арбобларникига жуда-жуда ўхшаб кетаётганидир.
Халқаро кузатувчиларнинг “Жаҳон” АА томонидан тайёрланган ана шундай фикрларига оид навбатдаги мақола “Халқ сўзи” газетасида (25.11) босилди.

“Аҳолининг кенг иштироки, фуқаролик институтлари, айниқса, овоз берувчиларга ҳар томонлама кўмаклашаётган ва мазкур муҳим ижтимоий-сиёсий тадбирни муваффақиятли ўтказишга катта ҳиса қўшган фуқароларнинг ўзини ўзи бошқариш органларининг фаоллигига қойил қолдим”, деган Бельгия Вакиллар палатаси депутати Давид Геертс.

Агар бу депутат маҳаллақўмнинг халқни назорат қилиш, тегишли органларга маълумотлар етказиб туриш, пахта терими мавсумида мажбурий меҳнатга жалб қилишдаги фаоллигини билганида янада кўпроқ қойил қолган бўлармиди?!

2014-2015 йилги парламент ва президент сайловларида кузатувчи сифатида иштирок этган Бельгия фахрий сенатори Доминик Тильманс эса ўз ҳамюртига жўр бўлиб: “Ўзбекистонни яхши билганим боис мамлакат биринчи президенти Ислом Каримов раҳбарлигида сиёсий, ижтимоий-иқтисодий ва бошқа соҳаларда кенг кўламли ислоҳотлар муваффақиятли олиб борилганини таъкидлашни истар эдим”, деган.

Фахрий сенатор бу “кенг кўламли ислоҳотлар” халқнинг тинкасини қуритгани, аҳоли қашшоқлигини тугатишга заррача ҳисса қўшмаётганини билганида балки шу таъкидидан қайтган бўлармиди!?

Эслатиб ўтиш керакки, Ўзбекистонда шу пайтгача ўтказилган бирорта сайловни европаликлар демократик ва очиқ-ошкоралик, тенглик асосида ўтди, деб ҳисобламаган. “Жаҳон” гапиртирган европалик халқаро кузатувчилар эса бунинг мутлақо тескарисини айтади.

Берлин шаҳридаги Халқаро иқтисодиёт академияси директори Ханс-Йоахим Кнаупе ҳам шулардан бири. У 2009 йилги парламент сайловида халқаро кузатувчи сифатида қатнашганини, бу сайлов “очиқлик ва демократия асосида ўтганига ишонч ҳосил қилгани”ни билдирган.

У, шунингдек, “Ўзбекистон тўплаган улкан тажрибани ҳисобга олиб, бўлажак президент сайлови ҳам фуқароларнинг фаол иштирокида, уларнинг ҳуқуқлари ва қонуний манфаатларига риоя қилинган ҳолда ўтиши”ни таъкидлаган.

Агар демократ хорижликлар шунча мақтовларни айтаётган экан, ўзимизникиларнинг оғиз кўпиртиришига жон бор экан-да, деб ўйлаб қолади соддароқ кишилар.

Баҳодир Шариф
Ўзбекистонлик газетхон таҳаллуси
Eltuz.com

Тағин ўқинг
26 январ 2017
Ўзбекистонда Тошкент шаҳридан ташқари барча ҳудудларда табиий газ ва электр энергияси таъминоти абгор аҳволда экани шу вақтгача ҳаммага маълум ...
23 май 2017
23 май куни Марказий Банк Бошқаруви раиси Муллажонов Файзулла Мақсуджонович 67 ёшида оламдан ўтди. 1950 йил Сирдарё вилоятида туғилган, ...
10 январ 2018
14 январь куни деновликлар ўтган йили Гиннесга кирган мега палов рекордини янгилашмоқчи. Рассом Туз эса рекорд концептини янада улканроқ ...
28 апрел 2016
Бугун Ўзбекистоннинг марказий шаҳарларида камбағалларнинг мункайган кулбаси ёнида қад кўтарган муҳташам қасрларни кўриш мумкин. Албатта, аксарият амалдорлар камбағал маҳаллада ...
Блоглар
16 октябр 2019
Қўшиқчи Жаҳонгир Отажоновнинг икки кун олдин олиб қўйилган ижодий фаолият учун лицензиясини «Ўзбекконцерт» 16 октябрь ...
7 октябр 2019
Мен 10 кунлик қамоқдан уйга келган заҳотим интервью берганимда Шабнамнинг тақдиридан мутлақо бехабар эдим. Менинг ...
7 октябр 2019
Мажбуран руҳий касалликлар шифохонасига ётқизилган хоразмлик блогер Нафосат (Шабнам) Оллошукурованинг отаси Болтабой Оллошукуров қизининг соғлом ...