Асосий мавзулар
21 январ 2019

Одилбойнинг озодликка чиқиши Мирзиёевнинг ташвишини камайтирди

Zeromax компаниясининг собиқ раҳбари Миродил Жалоловнинг озодликка чиқарилиши Ўзбекистон президенти Шавкат Мирзиёевнинг Германияга расмий ташрифига боғлиқ бўлиши мумкин.

Мазкур сафар олдидан пайдо бўлган хабарлар яна шундай тахминни дадил илгари суришга имкон беради.

Президентнинг Германияга бориши ҳақида маълум бўлганидан сўнг бир қанча немис компаниялари бу ташрифдан Zeromax дан ўз қарзларини ундиришда фойдаланиш ҳаракатига тушиб қолган эди.

Германиянинг йирик нашрларидан бири Süddeutsche Zeitung (Зюддойче Цайтунг) газетаси немис ширкатлари ўн йилдан буён Тошкентдаги Анжуманлар саройи ва “Бунёдкор” стадиони қурилишидаги иштироки учун тўланиши лозим бўлган 130 миллион евро маблағни ололмаётганини ёзди.

Шу билан бирга, бу маблағни ундириш ишига бундестаг аъзоси Рената Алт ҳам қўшилиб, Германия федерал ҳукуматига президент Мирзиёев билан учрашувда қарзлар масаласини кўтариш юзасидан сўров жўнатгани билдирилди.

Эътиборлиси, Миродил Жалолов қамоқдан озод қилиниши билан немис компаниялари олдидаги қарздорлик масаласи ўз-ўзидан ҳал бўлди.

Бу компаниялар манфаатларини ифодалаётган тадбиркор Вальдемар Киснер “Озодлик” билан суҳбатда эски қарзлар масаласида Ўзбекистоннинг янги раҳбариятига талаби йўқлигини маълум қилди.

Қолаверса, у Zeromax нинг немислар олдидаги қарзи миқдорига ҳам ойдинлик киритди. Бу қарздорлик 130 миллион евро эмас, балки 72 миллион еврони ташкил этади.

Ўзбекистон ҳукумати илк бор кредиторларнинг озодликка чиққан Миродил Жалолов билан учрашувига ҳам рухсат берди.

“Мен Миродил Жалолов билан Тошкентда учрашдим. У билан музокаралар ўтказдим… Ўзбекистон ҳукуматига ҳуқуқий тарафдан ҳам, маънавий тарафдан ҳам эътирозу шикоятимиз йўқ. Шу боис, Ўзбекистон президенти Шавкат Мирзиëев Германияга келганида бу масала кун тартибига киритилмаслигини истаймиз”, деган Вальдемар Киснер.

Интервьюнинг эътиборни тортадиган жиҳатларидан бири айнан шу сўзларда. Яъни немис тадбиркорлари Германияга отланган ўзбек делегациясига мазкур қарздорлик сабабли босим ўтказиш уринишларини бас қилган.

Бунинг эвазига, биринчидан, Ўзбекистон томони билан музокараларда немис компаниялари мамлакатдаги янги қурилиш лойиҳаларига иштирок этиш имкониятини қўлга киритишга эришди.

Иккинчи томондан, Миродил Жалоловнинг озод этилиши уларнинг ўз пулларини қайтариб олишини таъминлаши эҳтимоли ҳам ошди.

Бундай дейишга тўлиқ асос бор. Зеро, ўтган йилнинг октябрида Zeromax собиқ раҳбарининг рафиқаси Фотима Жалоловага тегишли экани айтиладиган фейсбукдаги саҳифада 2016 йилда Жалолов ўзига активларидан бири қолдирилса, кредиторларнинг талабларини бажаришни кечиктириш ёки уларнинг айримлари билан келишувга эришишга ваъда бергани ёзилганди.

Ф.Жалолова ўз эрига нисбатан янги айбловлар илгари сурилаётгани сабабли шундай фактларни ошкор қилишга мажбур бўлаётганини билдирганди.

Воқеалар ривожи немис ширкатларининг қарз масаласига Ўзбекистоннинг янги раҳбариятини аралаштириш ниятидан қайтишига Миродил Жалоловнинг озодликка чиқарилгани ҳам муҳим роль ўйнаганини кўрсатади.

Бу билан Мирзиёевнинг Германияга ташрифи арафасида ўзбек расмийлари камида иккита ижобий мақсадга эришишига йўл очилди.

Биринчидан, узоқ йиллар бошоғриқ бўлиб келган қарздорлик масаласида томонлар учун мақбул ечим топилди.

Иккинчидан, немис инвесторларининг Ўзбекистон ҳукуматига ишончини тиклаш, демакки, мамлакатга янги сармоялар келишига замин яратилди.

Сардор Азим
Eltuz.com

Тағин ўқинг
15 феврал 2017
“Жамият” газетаси (10.02) нодавлат нотижорат ташкилотлар фаолиятининг “сирли қирралари” ҳақида мақола эълон қилди. Унда ёзилишича, “дунёда ўз манфаатини бошқаларникидан ...
11 декабр 2017
5 декабрда Amnesty International инсон ҳуқуқлари ташкилоти ҳуқуқ ҳимоячиларининг ўлими ва уларнинг ўлдирилиши ҳолатлари кўпайиши тенденцияси мавжудлигини тасдиқлайдиган ҳисоботини ...
5 май 2015
Институтнинг биринчи курсида ўқиганим 1980 йилда манғитлик шоир Мансур Ахмедов билан жўра эдик. Мансур Ахмедов бир куни менга Абдулла ...
6 апрел 2018
Тошкент шаҳри бош имом-хатиби 60 ёшли Анвар Турсунов халқ орасида 16-горбольница деб айтиладиган Шошилинч тиббий ёрдам кўрсатиш республика илмий ...
Блоглар
16 октябр 2019
Қўшиқчи Жаҳонгир Отажоновнинг икки кун олдин олиб қўйилган ижодий фаолият учун лицензиясини «Ўзбекконцерт» 16 октябрь ...
7 октябр 2019
Мен 10 кунлик қамоқдан уйга келган заҳотим интервью берганимда Шабнамнинг тақдиридан мутлақо бехабар эдим. Менинг ...
7 октябр 2019
Мажбуран руҳий касалликлар шифохонасига ётқизилган хоразмлик блогер Нафосат (Шабнам) Оллошукурованинг отаси Болтабой Оллошукуров қизининг соғлом ...