Асосий мавзулар
12 феврал 2019

Tashkent City қурилиши метро учун қанчалик хавфсиз?

Бугун Тошкент метрополитенидан фойдаланаётган юз минглаб ватандошларимиз яна шу саволга жавобни билишга ҳақли.

Лекин метрополитен раҳбарлари нега бир неча ойдан буён метронинг “Халқлар дўстлиги” ва “Пахтакор” бекатлари оралиғида поездлар одатдагидан секин ҳаракатланишининг асл сабабини яшириб келмоқда?

Ўтган йилнинг сентябрида бу бекатлар оралиғида поездлар ҳаракати секинлашганига сабаб мазкур участкаларда шпаллар ва рельслар алмаштирилаётгани эканини маълум қилган эди.

Шу билан бирга, бу ишлар 5-10 кунда ниҳоясига етказилиши билдирилиб, йўловчиларнинг кўнгли тинчлантирилган эди.  

“Метро составларининг секинлашиши 5 кундан 10 кунгача давом этади, йўловчиларнинг безовта бўлишига ҳеч қандай сабаб йўқ”,- деганди ўшанда Тошкент метрополитени мулозими.

Бироқ орадан 5 ойдан кўпроқ вақт ўтса ҳамки, поездларнинг ҳаракати одатдаги маромга тушмади. Бу эса турли шов-шувларни келтириб чиқармоқда.

Жумладан, поездларнинг секинлашувига сабаб Tashkent City қурилиши пайтида туннелга шикаст етганидир, деган гап-сўзлар ҳам тарқалди.

Аммо бу миш-мишлар Tashkent City маъмурияти томонидан ҳам, метрополитен мулозимлари томонидан ҳам рад этиб келинмоқда.

“Элтуз” ўз манбалари орқали бу саволга жавоб топишга ҳаракат қилди. Маълум бўлишича, метронинг поездлар секинлашаётган участкасида, метрополитендаги манбанинг айтишича, ёриқни мустаҳкамлаш ишлари олиб борилаётир.

“Ҳозир бу ёриқни бартараф этиш мақсадида мустаҳкамлаш ишлари олиб бориляпти. Ўша участка темир тиргаклар ёрдамида мустаҳкамланяпти”, деди манба “Элтуз” билан суҳбатда.

Ҳақиқатан ҳам поезд составлари секинлашадиган участкада туннел деворларига темир тиргаклар ўрнатилаётганига гувоҳ бўлиш мумкин. Фақат деворнинг бир томонидагина камида 10 та шундай тиргак ўрнатилган.

Лекин “Элтуз” манбаси туннел деворининг ёрилишига нима сабаб бўлганини аниқ айта олмаслигини билдирди.

“Tashkent City қурилишида оғир техникалар ишлаяпти. Бундан ташқари, баланд бинолар қурилаётгани сабабли уларнинг пойдевори ҳам чуқур олинади. Ҳозир пойдевор учун чуқур қазилгандан сўнг 14 метрлик узун бетон ходалар ҳам ерга қоқиб чиқиляпти. Балки шулар таъсир қилган бўлиши мумкин. Аммо бу фақат менинг тахминим, холос. Ҳатто бизга ҳам ёриқ пайдо бўлганининг асл сабаблари айтилаётгани йўқ”, деди манба.

Унинг сўзларига кўра, метрополитен хизматчилари ўзаро гурунгларда бу носозликни “ёриқ” деб айтади. Аслида бу туннелнинг чўкишими ёки ҳақиқатан ҳам қандайдир ёриқми, мазкур ҳолат Tashkent City қурилишига қанчалик боғлиқ, буни кўпчилик билмайди.

Кўпчилик, жумладан, юз минглаб йўловчиларга ҳам аниқ маълум қилинмаётган бу носозлик аслида нима эканлигини очиқлаш турли ортиқча гап-сўзларга чек қўяди.

Шунга қарамай, ҳозирча бирорта расмий бунга журъат этмаяпти.

Баҳодир Шариф
Eltuz.com

Тағин ўқинг
13 март 2017
Мархум президент Ислом Каримов хотирасини абадийлаштириш қарорини изоҳлашни сўраб, Элтуз нашри жамиятшунос олим Баходир Мусаевга мурожаат этди. Бундан илгари ...
24 октябр 2016
Пахта теришга одамларнинг мажбур қилинмаслиги ёлғон эканини, бугун ёш бола ҳам билади. Гарчи кўчаларда “Пахта теримида мажбурий меҳнат ҳолатларига ...
25 январ 2016
Маданият ва спорт вазирлиги эълон қилган Ўзбекистон халқ артистлари рўйҳат билан танишаркан, уларни ҳукумат исталган ва исталмаганларга ажратганини сезиш ...
27 феврал 2019
2019 йил Юсуф Хос Ҳожибнинг 1000 йиллиги, “Қутадғу билиг”нинг 950 йиллиги Қозоғистон ва Туркия ташаббуси билан ЮНЕСКО томонидан дунёда ...
Блоглар
3 июн 2019
28 май куни Тошкентда ўтган конференцияда президентнинг тўнғич қизи Саида Мирзиёева маҳаллий оммавий ахборот воситаларининг ...
23 май 2019
Лас-Вегас – гуноҳлар шаҳри. Аҳолиси ярим миллион, даромади казино ва қимордан келадиган бу шаҳарда бир ...
16 май 2019
Ҳақиқатга қайси томонидан қарасанг ҳам бир хил кўринади, дейишади. Маҳмуд Ражаб -шоир, ёзувчи, шу миллатнинг ...