Германияда полиция ва божхона ходимлари Алишер Усмоновнинг қатор уйларида тинтув ўтказди

Мюнхен атрофидаги уйларда ва Бавариянинг Роттах-Эгерн коммунасидаги виллада ўтказилган тинтувлар пайтида нархи 140 минг евролик Mercedes Maybach S500, 180 минг евролик Mercedes Brabus фургони, яна бошқа учта автомобил ва қимматбаҳо моддий бойликлар мусодара этилди.

Усмоновнинг вакили журналистларнинг саволларига жавоб бермади.

Германия полицияси Усмоновни пул ювишга алоқадорликда гумонламоқда. Расман билдирилишича, полиция Усмоновга нисбатан турли банклардан пул ювиш гумони қайд этилган 90 та билдирув олган. Терговчилар Усмоновнинг банк ҳисобларида шубҳали транзакциялар бўлганини аниқлаган.

Ўтган йилнинг сентябрида Федерал жиноят қидирув идораси ва Солиқ хизмати Усмоновнинг Тегернзее кўли атрофидаги виллалари, Франкфурт-Майндаги квартираси ва Бремен портидаги “Дилбар” яхтасида тинтув ўтказган эди. Тинтув пайтида келиб чиқиши ўзбекистонлик бўлган Россия олигархининг қимматбаҳо санъат асарлари коллекцияси мусодара қилинганди.

Россиянинг Украинага бостириб кириши ортидан “Путинга яқин бўлган шахслар” қаторида Алишер Усмоновга нисбатан ҳам ғарб санкциялари жорий этилган. Сўнгги марта 2023 йилнинг апрель ойида АҚШ Молия вазирлиги ва Британия ҳукумати Алишер Усмоновнинг USM холдингига нисбатан санкциялар киритган. Ўшанда USM холдингига алоқадорлиги айтилган Ўзбекистондаги “Охангаронцемент” АЖ ва “Akkermann Cement CA” МЧЖ нисбатан ҳам санкция рўйхатига тушган эди.

Келиб чиқиши намонгонлик бўлган Россиядаги йирик тадбиркорлардан бири Алишер Усмонов Италиянинг Corriere della Sera нашрига берган интервьюсида Путиннинг яқин одамларидан бири” эканини инкор қилди.

Forbes журналига кўра, Алишер Усмонов Россиядаги энг бой одамлардан биридир. Унинг бойлиги камида 14,5 миллиард долларни ташкил этмоқда. “Проект” лойиҳаси ўтказган журналистик суриштирувда Алишер Усмонов Россия армиясини таъминлашда очиқ-ошкор иштирок этиб келаётган 81 нафар олигархдан бири сифатида тилга олинган.