Асосий мавзулар
6 ноябр 2018

Фарғоналик собиқ нотариуслар реабилитация истамоқда

Фарғона вилояти нотариал идораларининг бир гуруҳ собиқ ходимлари ўзларига нисбатан Миллий хавфсизлик хизмати (ҳозирги Давлат хавфсизлик хизмати) томонидан уюштирилган жиноят иши юзасидан “адолат истамоқда”.

Уларнинг “Элтуз” таҳририятига юборган мактубида ёзилишича, 2016 йилда 22 нафар давлат нотариуси ва нотариал идораларнинг элликка яқин ходимига нисбатан “қасддан ғайриқонуний равишда жиноят иши қўзғатилган”. Бир кимсанинг нотариус устидан ёзган аризаси асосида Фарғона вилоятининг Олтиариқ, Риштон, Бағдод, Учкўприк, Бувайда, Ўзбекистон, Қува, Тошлоқ туманлари, Қўқон ва Фарғона шаҳарларидаги нотариуслар жавобгарликка тортилган.

Мактубда жиноят иши фақат махсус тузилган рўйхатга киритилган нотариусларга нисбатан қўзғатилгани, “буни бемалол “нотариуслар иши” деб атаса бўлавериши” таъкидланган.

Хатда баён этилишича, нотариуслар фуқароларга хизмат кўрсатишда ортиқча пул олганликда айбланган. Жиноят ишларида ҳеч қандай далиллар бўлмаган, фақатгина фуқаролардан мажбурлаб, алдаб, қўрқитиб олинган сўроқ баённомалари мавжуд, холос.

Мактуб эгаларининг маълум қилишича, тергов ҳаракатларини Фарғона вилояти прокуратураси томонидан тузилган тергов гуруҳи амалга ошириши лозим бўлган ҳолда бу ишларга ноқонуний ҳолда молия ва солиқ, СВОЖҚКД, ИИБ ходимлари жалб қилинган.

Тергов томонидан кўрсатмалар қўрқитиш, алдов, тазйиқлар воситада олингани, ҳатто вафот этган баъзи фуқаролар иштирокидаги сўроқ баённомалари расмийлаштирилгани иддао қилинади мактубда.

Унда яна ёзилишича, судланган нотариусларнинг ҳар биридан миллионлаб сўм (баъзиларидан қарийб юз миллион сўм) “зарар” давлат фойдасига ундирилган.

Собиқ нотариуслар бу ишларнинг бошида МХХ Фарғона вилояти бошқармасида ўша пайтда суд ва адлия соҳаси куратори бўлган Сардор Қурбонов турганини, тергов гуруҳи аъзолари ва судьялар унинг кўрсатмасини сўзсиз бажарганини маълум қилган.

“Эшитишимизга қараганда, Фарғона вилояти адлия бошқармасининг собиқ бошлиғи Мирҳаёт Назаралиев Фарғона вилояти ҳокими ва МХХ вилоят бошқармаси бошлиғи билан чиқиша олмай қолганлиги учун уни ишдан бўшатиш мақсадида юқоридаги “қирғинбарот” уюштирилган, адлия бошлиғи эса МХХ ходимлари қўлида қўғирчоқ бўлиб қолганлиги сабабли шу нохақликларнинг юз беришига кенг йўл очиб берган ва ходимларини қурбон қилган”, дейилади мактубда.

Собиқ нотариуслар ўзларининг реабилитация қилиниши, ўзларига қилинган “ноҳақликлар” фош этилишини сўраб Президент қабулхонасига, Бош прокуратурага, Олий судга, Судьялар олий кенгашига, Ички ишлар вазирлигига мурожаат қилишганини, шунга қарамай, бу мурожаатлар айнан терговни олиб борган Фарғона вилояти прокуратурасига юборилаётганини билдирган.

Мактуби сўнггида собиқ нотариуслар “адолат қарор топишида ёрдам” сўраган.

Eltuz.com

Тағин ўқинг
22 апрел 2019
Қадимги туркий тилнинг иккита асосий алифбоси бор — Ўрхун-Енисей (кўктурк, руник) ёзуви ҳамда уйғур алифбоси. Бизгача етиб келган матнларнинг ...
5 ноябр 2015
30 октябр куни милиция ходимлари Яккабоғ тумани Амир Темур жамоа хўжалиги, Хўжа Илғор маҳалласида яшовчи Манзура Туробованинг 6 сигири ...
8 январ 2018
7 январ куни президент Мирзиёев Тошкентнинг Зангиота туманидаги чиқишида “Абу Саҳий” МЧЖ “Тошкент Ипак йўли”га ўзгаритирилгач, давлатга 15 кунлик ...
18 январ 2018
Миллий хавфсизлик хизмати собиқ генерали Шуҳрат Ғуломов қамоқхоналардаги айрим сиёсий ва диний маҳкумларни йўқ қилиш гуруҳини тузган. Бу ҳақда ...
Блоглар
14 август 2019
Ўзбекистон Давлат хавфсизлик хизмати раиси Абдусалом Азизовнинг Покистонга ташрифи ва “Толибон” ҳаракати вакилларининг Тошкентга сафари ...
13 август 2019
Таниқли жаноб Алламжонов раҳбарлик қиладиган Ўзбекистон Президенти маъмурияти ҳузуридги Ахборот ва оммавий коммуникациялар агентлиги тағин ...
1 август 2019
Ўзбекистон ҳам шармандали равишда уйғур қардошларимизга бўлаётган Хитой ҳукумати зулмини қўллаб чиққан 50 та давлат ...