Prezident tabrigidan to‘lqinlanish haftaligi

27 iyun – O‘zbekistonda Matbuot va ommaviy axborot vositalari xodimlari kuni munosabati bilan davlat rahbari yo‘llagan tabrik mamlakat jurnalistlari uchun to‘lqinlanish va mas'uliyat hissini tuyish haftaligini boshlab berdi, desak mubolag‘a bo‘lmaydi.

Chunki odatda bunday tabrik e'lon qilingandan so‘ng mahalliy jurnalistlar unday kelib chiqadigan vazifalarni belgilash, «bildirilgan yuksak ishonchni oqlash» kabi kayfiyatlarga beriladi. Bu holat esa ko‘pincha bir haftacha davom etadi. Keyin hayot iziga tushib, jurnalistlar yuqoridan o‘rgatilgan qo‘shiqlarni kuylashda davom etadi.

«Xalq so‘zi» gazetasi ham prezident tabrigidan «ko‘tarinki kayfiyat, yuksak ishonch» tuygan qoraqalpog‘istonlik jurnalistlarning dil so‘zlarini chop etdi.

«Prezidentimiz o‘z tabrigida milliy matbuotimiz vakillarining mamlakatimiz va dunyo miqyosida bo‘layotgan yangiliklarni tezkorlik bilan yetkazish borasidagi faoliyatini yuqori baholadi», deydi jurnalist.

Agar bu tezkor vakil sammitni yoritishda mamlakatning bosh axborot manbai – O‘zA bo‘lsa, undan ko‘chirilgan maqolalarni chop etgan markaziy nashrlar bo‘lsa, bunday tezkorlikning narxi sariq chaqa ham emas-ku, deydigan mard yo‘q.

«Yurtboshimiz tabrigidagi: «…sizlarning ezgu orzu-intilish va tashabbuslaringizni doimo qo‘llab-quvvatlashga tayyor ekanimni, sizlarni o‘zimning eng yaqin yordamchim va maslakdoshlarim deb bilishimni takroran aytmoqchiman», degan so‘zlari bizni yanada to‘lqinlantirib yubordi», deb yozadi qoraqalpoqlik jurnalist.

Eshagiga yarasha tushovi, deb shuni aytadi-da dono xalqimiz.

Bayram bahona «Yilning eng yaxshi jurnalisti» tanlovi g‘oliblari ham e'lon qilindi. «Hurriyat» gazetasi ularning ayrimlaridan minnatdorlikka yo‘g‘rilgan fikrlar olishga ham ulgurdi.

«Mediamakonda ma'naviyatga zid, qaysidir yovuz kuchlarning tor manfaatlariga xizmat qiladigan axborotlar kam deysizmi? Ularga qarshi dadil va o‘tkir publitsistik chiqishlar qila olish… milliy axborot makonimizdagi fidoiy xodimlarning eng muhim vazifalaridandir», deydi tanlov sovrindorlaridan biri.

O‘zbekiston matbuoti xalq manfaatini ko‘zlab dadil va o‘tkir publitsistik chiqish qilmaganiga ko‘p yillar bo‘ldi. Balki prezident tabrigidan to‘lqinlangan mahalliy jurnalistlar endi bu nuqsonga ham e'tibor qaratar!?

Eltuz.com