«Avval qarzlarni qaytaring!»

Prezident Mirziyoev mamlakatning xorijda muzlatilgan korruptsiya pullarini qaytarish va chet el sarmoyasi kiritishga jahd qilarkan, tag‘in O‘zbekistonning oldingi prezidenti Islom Karimov oilasining eski kasofatlariga duch kelmoqda.

Shveytsariyada chiqadigan «Tages-Anzeiger» 16 yanvar kuni Gulnora Karimovaning sobiq eri Mansur Maqsudiy o‘zi ko‘rgan zarar uchun Shveytsariyada muzlatilgan aktivlardan 100 million frank miqdorida tovon puli olish harakatida ekanini yozdi.

Maqsudiyning iddaosiga ko‘ra, xotini bilan ajrashgach, uning O‘zbekistondagi aktivlari Gulnora Karimovaga tegishli «Zeromaks» shirkatiga o‘tib ketgan.

Shveytsariyada muzlatilgan pullarning O‘zbekistonga qaytarilishi masalasi bot-bot takrorlanayotgan pallada O‘zbekistonning nemis shirkatlaridan ham tag‘in 130 million yevro qarzi borligi ochiqlandi.

Berlinda chiqadigan Süddeutsche Zeitung gazetasining 14 yanvar kuni yozishicha, Shavkat Mirziyoev tashrifi oldidan nemis parlamenti a'zosi Germaniya federal hukumatiga O‘zbekistonning o‘n yildan buyon kechiktirilayotgan qarzlari yuzasidan so‘rov jo‘natgan.

2009 yili bankrot deya topilgan «Zeromaks» buyurtmasi bilan Toshkentda nemis shirkatlari Forumlar saroyi va «Bunyodkor» o‘yingohi qurilishida ishtirok etishgan edi.

Rassom Tuz
Eltuz.com