Asosiy mavzular
8 aprel 2019

Milliy gvardiya reyderlik tuzilmasiga aylanib boryapti…mi?

So‘nggi vaqtlarda tadbirkorlik sub'ektlariga tegishli bo‘lgan mulkning Milliy gvardiya foydasiga tortib olinayotgani bilan bog‘liq ikkita mojaro kuzatildi.

Bularning birinchisi Yangiobod turbazasi bilan bog‘liq. Joriy yilning 25 yanvarida, «Eltuz» nashri bu yerga mahalliy hokimlik vakillari militsiya va Milliy gvardiya xodimlari hamrohligida kelib, ob'ekt “davlat va jamiyat ehtiyojlari uchun” olib qo‘yilishini bildirgani haqida yozgan edi.

Keyinroq Samarqand shahrida ham Milliy gvardiya tadbirkorga tegishli mol-mulkka ega chiqayotgani ma'lum bo‘ldi.

Kun.uz saytining yozishicha, tadbirkor Aziz Ibodullaevga tegishli ikkita minifutbol maydoni Milliy gvardiya ehtiyojlari uchun olib qo‘yilmoqda.

Saytning bildirishicha, bu sport maydonchalari 2017 yili Navro‘z bayrami kuni to‘liq foydalanishga topshirilgan. Qurilish ishlariga tadbirkor 1,6 milliard so‘m sarflagan. Endi esa maydonlarni buzish to‘g‘risida Milliy gvardiya markaziy devonidan tinimsiz xatlar kelmoqda.

Minifutbol maydonlari Samarqand oziq-ovqat kasb-hunar kolleji hududida joylashgan bo‘lib, tadbirkor ta'lim muassasasi bilan kelishgan holda tegishli qonunchilikka muvofiq qurilish ishlarini bajargan. Yer kollejga tegishli ekani sababli yerga egalik huquqi tadbirkorda bo‘lmasa-da, qolgan barcha rasmiylashtiruvlar joyida.

Endi esa Milliy gvardiya vakillari kelib, kollej hududi to‘lig‘icha mazkur tuzilmaga o‘tishini bildirib, tadbirkorning shuncha sarflangan mablag‘iga kuyishiga sababchi bo‘layotir.

Tadbirkorning so‘zlariga ko‘ra, oziq-ovqat kolleji ko‘chib ketgandan keyin tayyorlangan kadastr inventar hujjatiga sport maydonlari kiritilmagan. Ya'ni ushbu hudud futbol maydonlarisiz ro‘yxatdan o‘tkazilgan. Shunga qaramay, Milliy gvardiya sobiq kollejning butun maydoniga ega chiqmoqda.

Yuqorida tilga olingan ikki holatda yana bir jihat borki, masala tadbirkorlarning huquqiy himoyasiga borib taqaladi.

Har ikki vaziyatda ham qonun himoyachilari masalani tadbirkorlarning emas, balki so‘nggi vaqtlarda mamlakatdagi eng qudratlilardan biri bo‘lib borayotgan kuchishlatar tuzilma – Milliy gvardiya foydasiga hal etish payida bo‘layotir.

Garchi Samarqand viloyati hokimi tadbirkorga boshqa hududdan yer maydoni ajratib berishini aytayotgan bo‘lsa-da, metall konstruktsiya asosida qurilgan yopiq futbol maydonchalarini shundayligicha ko‘chirib ketib bo‘ladimi?

Bu savolga javob yo‘q. Tadbirkor sarflagan 1,6 milliard so‘m mablag‘ni qoplash masalasi ham yechilmagan.

Qolaversa, turli tashkilotlarga qilingan murojaatlar ham samarasiz ketmoqda. Prokuratura esa ishni o‘rganishga asos yo‘qligini ro‘kach qilayotir.  

Yangiobod turbazasi bo‘yicha yaqinda Toshkent viloyatining Nurafshon shahri ma'muriy sudi mulkdor manfaatlariga zid qaror chiqardi.

Sudya Husan Hamidov viloyat hokimi G‘ulomjon Ibragimovning Yangiobod turbazasini tadbirkordan olib qo‘yishga oid 2019 yil 25 yanvardagi qarori qonuniy kuchga ega emasligini tan olishni rad etdi.

Nega Milliy gvardiya o‘z ehtiyojlari uchun bo‘sh hududlarga emas, aynan tadbirkorlarga tegishli ob'ektlarga ko‘z tutayotgani masalasi ochiq qolmoqda.

Ochiqdan-ochiq reyderlik hujumiga o‘xshab ketadigan bunday mojaroli holatlar uchun Milliy gvardiyaga tanbeh beradigan kuch bormikin yoki mazkur tuzilma o‘z xatti-harakatlari uchun yanada yuqoriroqdan qudrat olayotganmikin?!

Milliy gvardiya nisbatan yangi tuzilma va u me'yorida faoliyat yuritishi uchun tegishli infratuzilmaga ega bo‘lishi kerakligini tushunish mumkin.

Lekin bu infratuzilma tadbirkorlarning tayyor mol-mulkini tortib olish hisobiga tiklanmasligi shart. Aks holda bu davlat tuzilmasi reyderligiga bir dalil o‘laroq xizmat qiladi.  

Sardor Azim
eltuz.com

Tag‘in o‘qing
3 may 2016
Aprel oyida ham O‘zbekiston telekanallari «oqil va dono yurtboshi rahnamoligida farovon va baxtli hayot kechirayotgan, mislsiz yutuqlarni qo‘lga kiritgan ...
15 fevral 2021
Voqea bizning kunlarda bo‘lib o‘tadi. Farhod 18 yoshda. U sevgiga mushtoq. Ma'naviyatsiz sinfdoshlari telefonda hard porno ko‘rib o‘tirishganida Farhod ...
7 noyabr 2023
Salom qadrli muxlislar, ko‘rsatuvlarimizni Eltuz portaliga kelgan so‘nggi beshta maktubni o‘qish bilan davom ettiramiz. Ular O‘zbekistonning Qashqadaryo, Toshkent, Jizzax, ...
22 aprel 2019
Qadimgi turkiy tilning ikkita asosiy alifbosi bor — O‘rxun-Yenisey (ko‘kturk, runik) yozuvi hamda uyg‘ur alifbosi. Bizgacha yetib kelgan matnlarning ...
Bloglar
17 mart 2024
Rassom Tuz bir mavzu muhokamasini boshlasa ag‘dar to‘ntarini chiqarib barcha qirralarini o‘rganadi. Tanganing ag‘iniyam¸ bag‘iniyam¸ ...
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...