Qonundagi o‘g‘ri Lotu Guli otib ketildi, Ravshan Zolotoy qo‘lga olindi
19 avgust kuni Turkiyaning Antaliya shahrida asli gurjistonlik “vor v zakone” Nodir Salifov otib ketildi. «Eltuz»ga yetib kelgan ma'lumotga ko‘ra, Lotu Guli laqabi bilan mashhur Nodir Salifovning boshiga to‘rt dona o‘q uzilgan.
Antaliyadagi restoranlardan birida Lotu Guli bilan ovqatlangan erkak to‘pponchasi bilan uni otib tashlagan. Lotu bemorxonaga olib ketilgan, ammo uni qutqarishning iloji bo‘lmagan.
Ko‘p o‘tmay, turk politsiyasi Lotu Guli bilan yaqin aloqada bo‘lgan Xan Axmedlinskiyni qo‘lga olgan. Lotu Gulining qotili aynan u ekani aytilmoqda.
«Eltuz» manbasiga ko‘ra, Xan Axmedlinskiy qotillikdan bir necha daqiqa o‘tib asli o‘zbekistonlik avtoritet Ravshan Muhiddinov (laqabi Ravshan Zolotoy)ga qo‘ng‘iroq qilgan.
Oradan ko‘p vaqt o‘tmay turk politsiyasi Ravshan Zolotoyni Istanbulning Belek Duzu dahasidagi villasidan olib ketgan.
48 yashar Nodir Salifov umrining 12 yilini Ozarbayjondagi qamoqxonalarda o‘tkazgan, ozodlikka chiqqach, Turkiyaga yo‘l olgandi.
2018 yilda turk politsiyasi uni mamlakatdan deportatsiya qildi. Ammo u ko‘p o‘tmay yana Turkiyaga noqonuniy yo‘llar bilan kirib kelgani aytiladi.
Xan Axmedlinskiyni ikki kun oldin Istanbulda Ahtam Camarqandskiy va uning odamlari bilan ko‘rishgan edi.
Ravshan Muhiddinov (Ravshan Zolotoy) jinoiy avtoritetlarga yaqin bo‘lgan tadbirkor G‘afur Rahimovning jiyanidir. Joriy yilning mart oyida «Eltuz» G‘afur Rahimov va Ravshan Zolotoy o‘rtasida kelib chiqqan ziddiyatlar haqida xabar bergan edi.
Eltuz.com