Asosiy mavzular
3 aprel 2024

O‘zMTRKning ahmoqona o‘yinlari davom etadi

O‘zbekiston Milliy teleradiokompaniyasi raxbariyati ustidan navbatdagi shikoyat maktubi Eltuzga yetib keldi. Uni tag‘in O‘zbekiston milliy teleradiokompaniyasida faoliyat yuritib, qozoni zo‘r-bazo‘r qaynab turgan xodimlar yo‘llamoqda.

«O‘zMTRK rahbariyatining o‘z tasarrufidagi telekanallarga topshirgan oxirgi topshirig‘i otni kuldiradigan, eshakni hangratadigan darajada axmoqona bo‘ldi» deya yozadi maktub mualliflari.

Xatdan ma'lum bo‘lishicha, raxbariyat iddaosiga ko‘ra, so‘nggi paytlarda “BBC”, “Ozodlik”, “Eltuz” kabi millatimizga yot bo‘lgan g‘oyalarni targ‘ib qiluvchi ommaviy axborot vositalari o‘z chiqishlari bilan xalqimizni chalg‘itishga, to‘g‘ri yo‘ldan ketayotgan fuqarolarni yo‘ldan urishga harakat qilayotgan emish. Shu bois O‘zMTRKdagi yettita telekanal (“O‘zbekiston-24”, “O‘zbekiston”, “Yoshlar”, “Toshkent”, “Mahalla”, “Madaniyat va ma'rifat“ hamda ”Dunyo bo‘ylab” ) kanallari orqali har kuni soat 20-00 dan 21-00 ga qadar (Prime time vaqtida) bir soatlik shou tayyorlashi, bu ko‘rsatuvda albatta, mamlakatimizda so‘nggi yillarda olib borilayotgan izchil islohotlar, Prezidentning oqilona siyosati aks ettirilishi shart ekan.

«Bu ko‘rsatuvlarning efirga uzatilishini kompaniya raisining xotinbozligi bilan nom chiqargan o‘rinbosari Madamin hoji Safarov nazorat qilib borar ekan. (Odatda efirga chiqishi kerak bo‘lgan chiroyli qiz hoji akaning tungi suhbatidan o‘tmasdan ilojisi yo‘q.)» deya iddao qiladi maktub muallifi.

Rahbariyatning fikricha, xodimlar bunday ko‘rsatuvlar bilan yot g‘oyalarni targ‘ib qiluvchi OAVlarga qarshi kurashib, siyosatni tushunmayotgan fuqarolarni to‘g‘ri yo‘lga solar ekan.

Qizig‘i, maktub muallifi o‘zlari tayyorlayotgan bunday mavzudagi ko‘rsatuvlarga o‘zlari ham ishonmasligini ta'kidlaydi.

«Olayotgan maoshimiz ro‘zg‘or tebratishga ham yetmay turgan bir paytda ko‘rsatuvni ko‘rish, undagi balandparvoz gaplarni tinglash bilan bola-chaqa boqa olmaymiz-ku. O‘zimiz ishonmayotgan narsaga ochlikdan sillasi qurib borayotgan xalqni qanday ishontirish mumkin? Shuning uchun ham biz bu topshiriqni yuqorida ahmoqona deb baholadik» deya yozadi u.

Masalaning ikkinchi jihatiga e'tibor qaratadigan bo‘lsak, odatda telekanallar yuqorida ko‘rsatilgan praym-taym vaqtida aholi uchun qiziqroq bo‘lgan ko‘rsatuvlarni efirga uzatadi. Chunki bu paytda ekran qarshisiga nisbatan ko‘proq auditoriya yig‘iladi va shu paytda efirga uzatiladigan dori-darmon bilan bog‘liq reklamalardan ko‘proq pul ishlash mumkin bo‘ladi. Ahmoqona ko‘rsatuv efirga ketayotgan paytda uning o‘rtasida reklama berish mumkin emas. Qolaversa, reklama qo‘yilgan taqdirda ham uni hech kim ko‘rmaydi. O‘z o‘zidan kam ko‘rilgan reklamadan uning egalari biznesi ham rivoj topmaydi.

«Chunki ko‘rsatuvni ko‘rmagan odamlar o‘z-o‘zidan reklamani ham ko‘rmaydida. Bunday harakatlar bilan kimni aldayotganimizni hanuz tushunmaymiz» deya yozadi televidenie xodimi.

Ismi sir qolishini istagan “Mahalla” telekanali xodimining aytishicha, telekanal direktori Ikrom Choriev mazkur masalada, ya'ni har kuni kechki payt efirga uzatiladigan “paxta”ga boy ko‘rsatuvlar tayyorlash masalasida yig‘ilish o‘tkazgan. Yig‘ilishda ko‘rsatuv vatanparvarlik tuyg‘usi bilan yo‘g‘rilgan bo‘lishi alohida ta'kidlangan.

Majlisda xodimlardan biri direktorga quyidagi mazmundagi savolni bergan:

 – Ikrom aka, o‘zi shundog‘am tayyorlayotgan ko‘rsatuvlarimizning gonorarini to‘liq ololmayapmiz. Oyliklar kamayib ketgan. Reklamani joylash evaziga tayyorlanayotgan bu ko‘rsatuvlarning gonorarini qanday olamiz? Har kuni kechgacha o‘tirib buncha ko‘rsatuv tayyorlagandan keyin gonorar miqdori ham oshib ketadi-ku. Axir shundoq ham kompaniyamiz bankrot yoqasida turgan bo‘lsa.

Ikrom Choriev esa bugun ko‘plab davlat telekanallarining direktorlari xodimlarini ovutish maqsadida ishlayotgan jumlalaridan foydalangan:

 – Hurmatli jamoa! Gonorarni-ku bir amallab topishga harakat qilamiz. Lekin topolmasak ham, doimo pul haqida o‘ylab ishlasak, kasbimizda baraka bo‘lmaydi. Vatan taraqqiyoti, yurt farovonligini o‘ylab ham ishlash kerak-ku. Biroz sabr qilib turinglar, men Madamin akamga aytib 1-2 haftadan keyin bu ko‘rsatuvni telekanalimizdan oldirib tashlayman. Boshqa telekanallar tayyorlayversin. Madamin aka o‘zimizning odam – degan jumlalar bilan o‘z xodimlarini ovutgan.

Ikrom Choriev va Madamin hoji Safarovning hamtovoq ekani, Safarov Chorievni doimo qo‘llab kelayotgani bugun kompaniyada hech kimga sir emas, deya yozadi u.

Xullas, botqoqqa qarab ketayotgan O‘zMTRK rahbariyati bunday topshiriq bilan yana bir qadam oldinga harakatlandi. Bunday topshiriq Prezident Adminstratsiyasi mulozimlarining g‘oyasimi yoki O‘zMTRK yangi raisinikimi, hozircha bizga noma'lum. Lekin bir narsa aniqki, bunday g‘oyaga orqa qilayotgan mahalliy nashrlar xorijdagi OAVlar bilan ikki dunyoda raqobatlasha olmaydi. Aksincha, xalq oldida yana kulguga qolishadi.

Eltuz O‘zMTRK atrofida kechayotgan voqealar rivojini kuzatishda davom etadi. Kanalimizga obuna bo‘ling. Layk bosing. Super raxmat tugmachasi orqali bizni qo‘llab quvvatlang. 

Tag‘in o‘qing
4 yanvar 2020
Dengizda shamol ko‘tarilarkan, bu shamol kimningdir elkanini shishirib manziliga eltadi. Kimningdir kemasi esa shamolga chiday olmay g‘arq bo‘ladi.  Keyingi bir oy ichida 68 ...
24 fevral 2017
Andijonda pensiya pullarini vaqtida ololmagan pensionerlar yana plastik kartochkadan foydalanishga o‘tmoqda. Joylardagi pensiya jamg‘armalari bo‘limlari oldida har kuni tumonat ...
10 dekabr 2021
BMTning inson huquqlari bo‘yicha maxsus ma'ruzachisi Fionnuala Ni Aolain O‘zbekiston hukumatining Suriya, Iroq va Afg‘onistondagi ayollar va bolalarni vataniga qaytarish ...
13 may 2024
Kun surati
Bloglar
28 may 2024
Men millatchi emasman! Lekin qaytadan ta'mirlatilgan va Toshkent shahrining sobiq hokimi J. Ortiqxo‘jaev tomonidan Pasxaga ...
11 may 2024
1944 yilning 11 mayida Stalin barcha qrim tatarlarini Qrimdan surgun qilish haqidagi mash'um qarorni imzoladi. ...
6 may 2024
Hayrli kun! Urganch shahrida yashayman. Bugun quyidagi voqea yuz berdi: men avtobusda telefonda gaplashib turgandim. ...