Mirziyoev uchun teatr

Mirziyoev N viloyatining olis bir tumaniga vertolyotda uchib keldi. Yurtboshi tikuchar zinasidan tushib, atrofga alanglab qaradi. Atrof ivirsib yotibdi. Hamma tomon chiqindi. Daraxtlar oqlanmagan. Mahalliy hokim qo‘lini ko‘ksiga qo‘yib, ayyorona jilmayib turibdi.

«Mana, bo‘lar ekan-ku! Meni keladi deb ko‘cha supurmaganing bilinib turibdi», deya yurtboshi hokimning yelkasiga qoqib, majlis zaliga kirib ketdi.

Tashqarida qolgan hokim o‘rinbosari ko‘chaga chiqindi sepib, oqlangan daraxtlarni qoraga bo‘yab yurgan o‘qituvchi, shifokor va teatr artistlarga uyiga javob berish oldidan navbatdagi vazifani belgilab berdi:

«Ertaga yurtboshi N tumaniga borib, tovuqxona ochilishida qatnashadi. Sizlar sal oldin borib, hamma yerga chiqindi to‘kib chiqishlaring kerak. Viloyat teatri artistlari esa “asalari boquvchi” hoji ota , “tovuq boquvchi” tadbirkor, “limon yetishtirayotgan” sobiq terrorchi rolini o‘ynab berishlari shart. Qani, marsh! Haromilar!!!»

O‘qituvchi, shifokor va artistlar bo‘ynini qisgancha dono yurtboshini duo qilib, arzon uylari tomon ketishdi.

Rassom Tuz
Eltuz.com