Yonidan Muhammad Solih kitoblari chiqqan shoirning telefoni ham musodara qilindi

O‘zbekistonlik shoir, 56 yashar Mahmud Rajab 26 mart kuni ertalab 8.30 larda Gurjistonning Tiflis shahridan qaytayotganida Toshkent aeroportida o‘zbek bojxonachilari tomonidan ushlandi.

Bu haqda «Eltuz»ga xabar yetkazgan hamrohlari Mahmud Rajabning yonidan muxolifat lideri Muhammad Solih va uning ukasi Muhammad Bekjonning kitoblari topilgani, kitoblari va telefoni musodara qilinib, qo‘yib yuborilganini bildirishdi.

«Erk» demokratik partiyasi lideri Muhammad Solih o‘zbek she'riyatining ulug‘ daholaridan biridir. Muhammad Bekjon esa «Eltuz» tinglovchilariga «Alvido, Jasliq» (Qo‘rquvning nariyog‘ida) kitobi audioversiyasi bilan yaxshi tanish.

Mahmud Rajab Muhammad Solihni vatanga qaytarishni so‘rab prezident Shavkat Mirziyoevga murojaat bilan chiqqan o‘zbek ziyolilarining biridir.

Bir yil ilgari, 2018 yilning 29 mayida shoir Mahmud Rajab va yana uch nafar shaxs Muhammad Solih rasmi bilan tushgan suratini tarmoqqa qo‘ygani uchun prokuraturaga chaqirilgan edi.

Kitoblariga qo‘shib telefoni ham musodara qilingan shoir Mahmud Rajab so‘nggi soatlarda taksi kira qilib Toshkentdan Xorazm viloyatiga qaytmoqda. Biroq uning o‘zi bilan bog‘lanishning iloji bo‘lgani yo‘q.

Eltuz.com