«O‘lgan buvisiga yangi kafan…»

Ommaviy axborot vositalarida turk aktyori Burak O‘zchivitning yangi tug‘ilgan chaqalog‘iga Toshkentdan uy sovg‘a qilingani haqidagi xabarlarni 17 aprel kuni Toshkentning «Bizning Uylar Development» qurilish shirkati rad etdi.

«Brendimizning reklama yuzi bo‘lgan Burak O‘zchivitning yangi tug‘ilgan chaqalog‘iga kompaniyamiz tomonidan xonadon berilganligi haqida tarqalgan mish-mishlar haqiqatga mos kelmaydi.

Burak O‘zchivit sovg‘a olish uchun hech qanday talab qo‘ymagan va kompaniyamizda bunday turdagi sovg‘a berish masalalari muhokama qilinmagan», deya bildirildi shirkat Instagram sahifasida.

Turk aktyorining bolasiga uy berilgani haqidagi xabarlar ortidan o‘zbekistonlik taniqli bloger va shoumen Nozim Safarov Toshkent rasmiylarining chet elliklarga propiska va uy sovg‘a qilish udumini hajv qilib chiqqan edi.

«O‘zbekistonga umuman aloqasi bo‘lmagan turkiyalik qaerdagi Burakning kecha tug‘ilgan bolasi daje propiskalik bo‘ldi.

Sen esa hanuz o‘z uyingda o‘zing ijarada turasan, Mamarayim. O‘l shu kuningdan, Mamarayim.

Sevara Nazarxon kuylaganidek, «Yur, Mamarayim, surdik bu yerdan», deya yozgan edi Nozim Safarov.

Turk aktyorining o‘g‘liga yangi uy berilgani haqidagi xabarni dastlab Rossiyaga tegishli Sputnik.uz nashri tarqatgan, boshqa ko‘p saytlar ko‘chirib bosishgan edi.

Bundan sal avval, 16 mart kuni prezident Mirziyoev Toshkentda mamlakat sportini rivojlantirishga hali hech bir hissa qo‘shmagan Rossiya xokkeyi va figurali uchish yulduzlariga kvartiralar hadya qilishga farmon bergan edi.

Eltuz.com