Asosiy mavzular
7 noyabr 2018

7 sutkaga qamalgan jurnalistni tergovchi kaltaklagan

Qo‘shko‘pir tumani hokimligidagi tungi majlisni yoritmoqchi bo‘lgani uchun etti sutkaga qamalib, 5 noyabr kuni ozodlikka chiqqan urganchlik 47 yashar jurnalist  Davlatnazar Ro‘zmetov «Eltuz» nashri muxbiriga voqea tafsilotlari haqida bildirdi. 

“Menga qarshi qo‘llanilgan MKning 183-moddasi bo‘yicha ayblovga tergovchining 25 oktyabr kuni menga kaltak ostida yozdirgan iqrornomasi asos qilib olindi”, dedi Ro‘zmetov “Eltuz” bilan suhbatda.

Jurnalistning so‘zlariga ko‘ra, uni aroq ichib janjal ko‘targanlikda ayblashgan, biroq bunga isbot keltirilmagan. Sud tibbiy ekspertizasi qon analizi olmagan.

Tungi majlis kasofati

Ro‘zmetov 25 oktyabr kuni Qo‘shko‘pirga paxta safarbarligiga bag‘ishlangan tungi majlisda qatnashish uchun borgan edi.

“Prezident Shavkat Mirziyoev odamlarni ishdan qo‘yib, tungi majlislar qilishni to‘xtatish kerakligi haqida gapirganidan so‘ng ham buning tumanlarda davom etayotgani meni qiziqtirgan edi”, dedi Ro‘zmetov “Eltuz” muxbiri bilan suhbatda.

Kechki 10 lar atrofida majlisga yetib kelgan jurnalist Qo‘shko‘pir tumani hokimi Jo‘rabek Rahimovdan “Majlis hamma uchun ochiqmi yoki yopiqmi?” deya so‘raydi.

Bunga javoban hokim unga qatnashishi mumkinligini aytganidan so‘ng tezgina “majlis yopildi” deya e'lon qiladi va ishtirokchilardan tarqalishni so‘raydi.

Ro‘zmetovning so‘zlariga ko‘ra, u hokimga tashqariga chiqish oldidan bir necha savollar bergan. Jumladan, bu majlisga prokuror, ichki ishlar va boshqa turli kasbdagi odamlar qatnashayotgani, ertalab ular ishga chiqishlari kerakligini aytib, “Shunchalik zarurmi majlis qilib ularni ishdan qo‘yish?” deya so‘raydi.

Davlatnazar Ro‘zmetov, “Xorazm yoshlari” gazetasi muharrir o‘rinbosari

Jurnalist savoli militsiyaning kaltagi bilan qarshilandi

Ro‘zmetov telefonini yoqib, suhbatni yozib olishga kirishadi. Biroq  Qo‘shko‘pir hokimi Jo‘rabek Rahimov jurnalistning savollariga ortiq javob berishni ham ep ko‘rmaydi.

Odamlar tarqalayotgan paytda uning yonida fuqaro kiyimidagi ikki xodim paydo bo‘ladi va uning qo‘lini qayirib, “Damas” mashinasiga solib olib ketishadi.

“Ularning bittasi “Sen kimsan o‘zi?” deganiga “Jurnalistman” deb hujjatini ko‘rsatgan. Shunda u “Burnimga tutma hujjatingni, bu yerda men beraman savolni!” deya meni tahqirlab, biqinimga bir necha bor qattiq urdi” dedi Ro‘zmetov “Eltuz” muxbiriga.


Jurnalist Davlatnazar Ro‘zmetov O‘zbekiston yoshlar ittifoqi rahbari Qahramon Quronboevdan intervyu olmoqda.

Ichgani tasdiqlanmagan jurnalist hushyorxonaga jo‘natildi

So‘ng uni jinoyat qidiruv xodimlari dastlab tuman kasalxonasiga olib borishadi.

Biroq Qo‘shko‘pir tumani kasalxonasidagi navbatchi vrach noma'lum sabablarga ko‘ra, Ro‘zmetovning qoni tarkibida alkagol bor-yo‘qligini aniqlashni lozim topmaydi.

Shundan so‘ng jurnalistni jinoyat qidiruv xodimlari Qo‘shko‘pir tumani IIBsiga olib kelishadi.

Ular jurnalistni xonaga olib kirib, unga jismoniy va ruhiy tazyiq ko‘rsatib, aroq ichganligi haqida iqrornoma yozdirib olishadi.

Keyin esa Ro‘zmetovni viloyat hushyorxonasiga jo‘natish chorasini ko‘rishadi.

Telefondagi yozuvlar o‘chirildi, guvohlar tinglanmadi 

Shuningdek, soatlab uning telefonidagi ma'lumotlarni tekshirishadi. Keyin esa telefondagi ko‘plab ma'lumotlarni, jumladan, hokimlik majlisida olingan hamda tuman hokimi bilan bog‘liq barcha videolavha va suratlarni o‘chirib tashlashadi.

“Sudda telefonimdan tuman hokimi bilan bog‘liq bo‘lgan, Bog‘ot va Qo‘shkupir tumanlaridagi olingan intervyularim va suratlarning Jur'at ismli jinoyat qidiruv xodimi tomonidan o‘chirib tashlanganligi hususidagi shikoyatim sud tomonidan inobatga olinmadi.

Men hech kimni haqorat qilmaganim yoki birovga qattiq ham gapirmaganimni isbotlovchi guvohlarni jalb qilishga imkon berish haqidagi iltimosim tinglanmadi”, dedi Ro‘zmetov “Eltuz” muxbiri bilan suhbatda.

Shunday qilib, urganchlik jurnalist Ro‘zmetovga qarshi ochilgan ma'muriy ish bo‘yicha 29 oktyabr kungi sud majlisi qaror chiqaradi.

Urganchdagi hibsxonada joy bo‘lmagani uchun jurnalistni 7 sutka davomida Hazorasp tumani IIBga qarashli vaqtincha saqlash hibsxonasiga qamashgan.

“Xorazm yoshlari” gazetasi bosh muharriri o‘rinbosari Davlatnazar Ro‘zmetov ijtimoiy tarmoqda o‘zining liberal qarashlari va dolzarb chiqishlari bilan tanilgan o‘zbek jurnalistidir.

Eltuz.com

Tag‘in o‘qing
19 iyul 2018
Hech bir sababsiz “Sangorod”da qoldirishganini gapirarkan, Muhammad Bekjon kitobining navbatdagi bobida 2003 yilning iyulidagi voqealarni tilga oladi. O‘shanda u ...
20 sentyabr 2018
Qirg‘izistonda jinoiy ishlarda ko‘p qo‘llanilib siyqasi chiqqan, ekstremizm alomati bo‘lgan videomateriallar, broshyura, kitob saqlash bo‘yicha yuzlab ayblov hukmlari chiqarilmoqda, ...
22 oktyabr 2015
Bugun ertalab taksida ishga ketayotgan mahalimda,meni qitmirligim ishga tushib hukumatni va siyosatni maqtashga tushdim. Shu mahal taksi haydovchisi menga ...
15 yanvar 2016
Eltuz elektron pochtasiga kelib tushgan xabarga ko‘ra, bosh vazir Shavkat Mirziyoevning erkatoy kuyovlari Oybek va Otabeklar puli ko‘pligidan kerilishmoqda. ...
Bloglar
1 dekabr 2020
«Oshin» – 1983 yilda Yaponiyada suratga olingan ko‘p qismli film. Bosh rollarda Nobuko Otova, Yuko ...
25 noyabr 2020
Kuzda ketib kuzda qaytdim Sovet Armiyasi safidan. Bizni armiya safiga oliy o‘quv yurtlarining kunduzgi bo‘limidan ...
24 noyabr 2020
“Humo” nomli uchoq shirkati haqida gap chiqishi bilan eronlik do‘stlarim o‘zbeklarni plagiatda aybladi. Eronda “Humo” ...