Chemadonga yashirinib Turkiyaga o‘tishga uringan o‘zbek ayoli ushlandi

Gruziyadan chemodon ichida yashirinib Turkiyaga o‘tmoqchi bo‘lgan o‘zbekistonlik 27 yashar F.T. ismli ayol ushlandi.

Turk nashrlarining 1 sentyabr kuni xabar qilishicha, ayolni Gruziyaning Turkiyaga chegaradosh Sarp hududidan 24 yashar gruziyalik G.P. ismli erkak olib o‘tmoqchi bo‘lgan.

Oyoq olishi shubhali ko‘ringan erkakni chegarada turk politsiyasi to‘xtatib, undan chemadonini ochishni talab qilganida, undan o‘zbek ayoli chiqib kelgan.

Shuningdek, bu ayol mamlakatga besh yilgacha kirish huquqidan mahrum qilingan shaxs bo‘lgani aytiladi.

SSSR davrida chegaradan chemadonda, aniqrog‘i kontrabas g‘ilofi ichida odam o‘tkazish sahnasi mashhur «Assa» filmida aks etgan.

Shunga o‘xshash tarzda chegaradan o‘tish manzaralari, 60-yillarda GDR chegarasida kuzatilgan. Bu hujjatlar bugun Berlin devori muzeyidan o‘rin olgan.

Turkiyaning ayni chegara hududdan 2017 yilning mayida chemodonga yashirinib o‘tmoqchi bo‘lgan bir rossiyalik ayol, o‘sha yilning dekabrida esa gruziyalik bir yosh ayol ham ushlangan edi.

O‘zbekiston mustaqilligining 27-yilida ular safini o‘zbek ayoli to‘ldirdi. F.T.ga va uni chemadonda o‘tkazmoqchi bo‘lgan gruzin erkagi G.P.ga turk politsiyasi jinoyat ishi ochgan.

Eltuz.com