Surxondaryodagi internatda o‘quvchilarning zaharlanishi ortidan jinoiy ish ochildi

Surxondaryo viloyatining Sariosiyo tumanidagi ixtisoslashtirilgan maktab-internatida shu yilning 18 yanvar kuni o‘quvchilar ovqatdan zaharlanganligi haqida Eltuz xabar bergani ortidan ko‘plab e'tirozlar bildirilgan edi. 

Bugunga kelib Bolalar ombudsmani maktab bolalarining zaharlanishi yuzasidan olib borilgan  o‘rganish ishlari haqidaquyidagi ma'lumotni berdi.

Aniqlanishicha, ushbu maktab-internatga autsors xizmati ko‘rsatgan xususiy korxona tomonidan iste'molga yaroqsiz bo‘lgan mahsulotlardan sifatsiz oziq-ovqat tayyorlanishi oqibatida 33 nafar o‘quvchi «O‘tkir gastrit» alomatlari bilan tuman tibbiyot birlashmasiga murojaat qilgan.

Hodisa tezkor-tergov guruhi tomonidan o‘rganilishi natijasida maktab oshxonasidan olingan ayrim mahsulotlar sanitariya me'yorlari qoidalari va gigiena normalari talablariga javob bermasligi, hamda oshxona jihozlaridan foydalanish tartib qoidalariga rioya qilinmaganligi, bu esa bolalar o‘rtasida yuqumli oshqozon ichak kasalliklari bilan kasallanishga olib kelganligi aniqlangan.

Holat yuzasidan Sariosiyo tuman prokuraturasi tomonidan Jinoyat kodeksining 186-moddasi 4-qismi «b» bandi bilan jinoyat ishi qo‘zg‘atildi. Hozirda dastlabki tergov harakatlari olib borilmoqda.

Shu o‘rinda, ayrim xolatlarga e'tibor qaratsak. “Zamon” muxbiriga shifokor bolalar ovqatdan zaharlanmagan deb aytgandi. Biz buni shubha ostiga olgandik. O‘shanda shifokor yolg‘on gapirishga majburlanganmidi yoki mahalliy jurnalist? Nega bizda doimo bo‘lar ish bo‘ldi, yopiq qozon yopiqligicha qolsin qabilida ish tutishadi? Kimningdir yopiq qozoni, kim uchundir ayni qozondagi ovqatdan zaharlangan 33 nafar voyaga yetmagan bolalar hayotidan azizmi?  

 Eltuz uydagi gapni ko‘chaga olib chiqadi. Kanalimizga obuna bo‘ling, videolarimizga layk bosing.