Андижонлик аёл 5 яшар ўғлини уриб ўлдирди

Избоскан туманининг Жалолиддин Мангуберди маҳалласида яшовчи, икки боланинг онаси Шаҳноза В. (аёлнинг тўлиқ исми «Элтуз»га маълум) 15 октябрь куни  5 яшар ўғлини аёвсиз калтаклаган.

Уйга қамаб олиниб, узун таёқ билан калтакланган боланинг танаси зарбалардан моматалоқ бўлиб кетган. Калтак азобидан бола дод солиб кўчага қараб югурган ва йиқилиб вафот этган.

Текширувлардан сўнг маълум бўлишича, қочиш асносида болакайнинг қўрқувдан юраги ёрилиб кетган. Бу воқеа куппа-кундуз куни бўлган, аммо қўни-қўшни, маҳалла-кўйдагилардан ҳеч ким бақир-чақирни эшитмаганини айтмоқда.

Қўшни аёллардан бирининг айтишича, Шаҳноза В. ўта асабий бўлган, болаларини тез-тез калтаклаб турган. Маълумот беришларича, аёлнинг эри Россияга ишлагани кетган, аёл тирикчилик важидан қийналиб асабий бўлиб қолган.

Ҳозирда ўз боласининг ўлимига сабабчи бўлган она устидан тергов ҳаракатлари бошланган. Бу воқеа ҳақида ИИВ 17 октябрь куни маълум қилди.

eltuz.com