Асосий мавзулар
11 феврал 2021

Вилоят ҳокими қабулига кирмоқчи бўлган фуқароларни туман ҳокимлари тўхтатиб қолмоқда

Андижонлик фуқаролардан бирининг айтишича, у бир неча ойдан бери вилоят ҳокими қабулга кира олмаётир. Фуқаро омади чопиб унинг қабулига ёзилган тақдирда ҳам бундан хабар топган туман ҳокимлиги вакиллари бунга қаршилик кўрсатишади.

Избосканлик Нодира Мамажонованинг сўзларига кўра, туман ҳокими Серобиддин Исмоилов ходимларига айтиб, бир неча марта аёлни қабул олдидан қайтариб юборган.

“4 йилдан бери туман ҳокимлигига ёрдам сўраб мурожаат қиламан. Сайёр қабулга 3 марта бориб қайтиб келдим. Ўзим ҳам, турмуш ўртоғим ҳам 2-гуруҳ ногиронимиз. Кам таъминланган, ногиронлиги бор фуқароларга кир машина, тикув машинаси каби маиший жиҳозлар бериляпти.

Бизни эса хатловга ҳам қўшишмаяпти. Ёзмаган жойим қолмади, ҳатто ОАВларда ҳам чиқдим. Мурожаат қилаверганимдан ҳокимликдагилар мени ёмон кўриб қолишган. Вилоят ҳокимининг қабулига минг уринсам ҳам кира олмаяпман”, дейди аёл.

Ҳар ойнинг сўнгги шанбасида Андижон вилояти ҳокими Шуҳратбек Абдураҳмонов мурожаатига ўз туманидаги ҳокимлик ва давлат идораларида ечим топа олмаган фуқароларни қабул қилади. Шу куни вилоятнинг барча юқори ташкилотлари мутасаддилари томонидан ҳам турли муаммолар билан келган аҳоли арзлари тингланади.

– Айрим туман-шаҳар ҳокимлари “кети” очилиб қолишидан қўрқибми ё муаммоларни кам қилиб кўрсатиш учунми, ўз ҳудудидан келган фуқароларни вилоят ҳокимига яқин йўлатмасликка уриняптилар. Ҳатто айримлари шотирларига айтиб, эшик ёнидан зўрлаб қайтариб олиб кетган кунлари ҳам бўлмоқда, – дейди қабулга кирмоқчи бўлиб юрган фуқаролардан бири.

70 ёшли Ҳасанбой Домлажонов вилоят ҳокимининг қабулига кирадиган куни Хонобод шаҳри ҳокими Машъал Тожибоев томонидан тўхтатиб қолинган. Фахрий ўқитувчи қабулга куздан бери киришга уринаётганини билдирди.

– Ё ўзи менинг масаламга ёрдам кўрсатмайди, ё Абдураҳмонов олдига боришимга қўймайди, – дейди фуқаро.

Андижон туманида балиқ ҳовузи бўлган тадбиркор Абдуғулом Турғунов ери ноқонуний олиб қўйилгани масаласида ёрдам сўраб бормаган жойи қолмади. Бир йилдан буён унинг мурожаатларига Андижон тумани ҳокимлиги жўяли жавоб қайтармаган. Тадбиркор вилоят ҳокимининг телеграмдаги каналига бир неча бор хат ёзгани, бироқ хатлари жавобсиз қолаётганини айтмоқда.

– Эплаганлар кириб, баҳоли қудрат муаммосига ечим топяпти. Лекин ҳокимга кира олаётганлар мурожаат қилмоқчи бўлганларнинг ўндан бири ҳам эмас, – дейди у. – Мен ҳам ҳоким билан юзма-юз ўтириб саволларимга жавоб олиш ниятим бор эди. Афсуски, кира олмаяпман. Қабулга ёзилиш институтга кириш имтиҳонларидан ҳам қийин бўлиб кетди.

Андижон вилояти ҳокимининг 2021 йилдаги илк қабули шу йилнинг 9 январь кунига белгиланганди. Аммо, очиқланмаган маълумотларга кўра, шу куни вилоят раҳбари бирортаям фуқарони қабул қилмаган. Номаълум муддатга қолдирилган қабул, мана, бир ой ўтса-да, ҳамон ўтказилгани йўқ.

Ҳокимлик ахборот хизмати хабарига кўра, шу ойнинг охирида Ш.Абдураҳмонов туманларда сайёр қабуллар ўтказади. Бироқ ҳоким билан юзма-юз гаплашиб дардини айтиш кимларга насиб қилади, кимлар эшикдан қайтарилади, бу ҳали номаълум.

Eltuz.com

Тағин ўқинг
23 сентябр 2020
Қашқадарё вилоятининг Китоб туманидаги 13-мактаб директори, 47 яшар Нурбек Турдиевнинг жасади 31 август куни мактаб ҳожатхонасида осиғлиқ ҳолда топилди. ...
13 май 2016
Варшава циркининг Тошкентдаги гастроли чоғида циркда томоша кўрсатаётган филлар қутуриб, томошабинларга ташлангани ҳақида хабар тарқалди. Воқеани ўз кўзи билан ...
24 май 2019
Интернетнинг ўзбек сегментини стакан деб қарасак, бу стакан ичида вақти-вақти билан тўфонлар юз бераётганини кузатамиз. Ëки Матбуот агентлиги бу ...
5 январ 2016
Жиззах вилояти ҳуқуқ-тартибот идоралари ходимлари асоссиз, уйдирма айбловлар билан қамоқда қолаётган ҳуқуқбон Ўктам Пардаевнинг оила аъзоларига Янги йил “совға”си ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...