Сассиқ ахлат, Россияда ушланган ўзбеклар ва мажбурий пахта терими

Элтуз порталига келган сўнгги бешта мактубни ўқиймиз. Улар Ўзбекистоннинг Фарғона, Андижон вилоятларидан ва Россиянинг Татаристон Республикаси турмасидан келган. Дастлабки шикоят Фарғонадан. Ёшлар агентлиги Фарғона шаҳар бўлими ёшлар етакчиларини дам олиш кунлари мажбурий пахта теримига чиқармоқда.

“Фарғонадан ёзяпмиз. Ёшлар агентлиги Фарғона шаҳри бўлими раҳбари ёшлар етакчиларини дам олиш кунлари мажбуран пахта теримига чиқаряпти. Ўқитувчилар ўрнига етакчилар қолдими? Ҳолатни назоратга олишларини сўраймиз” дея шикоят қилмоқда Фарғона шаҳар ёшлари етакчилари.

Кейинг мурожаат Россиянинг Татаристон республикасидан. Бир гуруҳ ўзбек мигрантлари уч ойдан буён Россия қамоғида ушлаб турилгани. Нотўғри ҳужжатларга имзо чекдириб, аэропортдан ушлаб олиб кетишганини иддао қилишмоқда.

“Россия Федерацияси Татаристон Республикасидан мурожаат қиляпмиз. Уйга кетаётганимизда аеропортда ушлаб қамаб қўйишди. Нотўғри ҳужжатларга қўл қўйдиришди. Дастлаб олиб келганда, эртароқ чиқиш учун армияга борсанг бўлади деб таклиф қилган эди. Биз рози бўлмадик. Уч ойдан бери қўйиб юборишмаяпти. Нима қилишмоқчи эканини ҳам айтишмайди. Ваколатли идоралардан ёрдам сўраб қоламиз…” дея ёзишмоқда Россия турмасида ҳибсда қолаётган ўзбек мигрантлари. Улар мурожаатларига аудиофайл ҳам илова қилишган.

Кейинги мактубни андижонлик Асакабанк мижози йўлламоқда. “Асакабанк” биздан олган ортиқча пулни қайтариб бермаяпти” дея иддао қилмоқд у.

“Мен – Ҳаётулло Бойбоев, Андижон шаҳри 1-тор Пиллакаш кўчаси 15-уйдан мурожаат ё‘лламоқдаман. “Асакабанк” тадбиркорлик қилган давримдан мендан ва онамдан ортиқча маблағ олиб қолган. Марказий банк вилоят бошқармаси ҳолатни текшириб, бизга жавоб хати берган. Лекин банк ҳалигача ортиқча ушланган маблағни қайтармаяпти. Ушбу масалада амалий кўмак сўраймиз” дея мурожат қилади Ҳаётулло Бойбоев.

Кейинги мактуб Фарғона вилоятининг Олтиариқ туманидан. Олтиариқлик ҳайдовчи жамоатчилик эътиборини бир неча йиллардан бери энг кўп авария содир бўлаётган чорраҳага светафор қўйилмаганига қаратади.

«Ассалому алайкум Элтуз жамоаси! Фарғона вилояти Олтиариқ туманидан мурожат йўллаяпмиз. ИИБ вазирлиги ҳайдовчилардан ҳар қандай усулда бўлса ҳам жарима ундиришни қойиллатади, лекин бир неча йилдан бери битта чорраҳага светафор қўйиб беришда ёрдам бермайди. Биз айтаётган чоррахада ҳар йили ўнлаб авария содир бўлади. Тумандаги энг кўп авария бўладиган чорраҳа.» дея ёзади олтиариқлик ҳайдовчи.

Ва ниҳоят сўнгги шикоят, Самарқанд шаҳрининг Мингтут кўчасасида тўпланган ахлат ва чиқиндилар ҳақида.

“Бу ердан ҳар куни қариялар, ёшлар, ёш болакайлар ўтишади. Ўтаётганда бадбўй ҳидига чидаб бўлмайди. Маҳаллада ва шаҳар ҳокимиятига қарашли Мароқанд чиқинди ташиш бўлими ходимлари ҳаммаси таътилга чиқиб кетганга ўхшайди. Назорат қиладиган ташкилот ва шахс қолмади. Илтимос Элтуз Портали,  бу муаммони ечишда амалий ёрдам кўрсатсаларинг.» Дея ёрдам сўрайди, ахлат ҳидидан безор бўлган Самарқанд турғуни.