Асосий мавзулар
13 январ 2020

Бош прокуратура Гулнора Каримова вилласидан топилган санъат асарлари хатланганини билдирди

11 январь куни Ўзбекистон Бош прокуратураси ҳибсда сақланаётган Гулнора Каримованинг Швейцариядаги уйидан топилган санъат ашёлари ҳақида баёнот берди.

Прокуратуранинг баён қилишича, Швейцария федерал прокуратураси билан ҳамкорликда Гулнора Каримованинг Женева шаҳрида жойлашган вилласида ўтказилган тинтув вақтида аниқланган ва хатланган 70 турдаги санъат ашёлари миллий бойликка тааллуқли ҳамда уларнинг Ўзбекистонга қайтарилиши бўйича ишлар олиб борилмоқда.

Аввал Гулнора Каримованинг Ўзбекистондаги яшаш манзилларида тарихий, маданий ва бадиий аҳамиятга эга деб топилган, умумий қиймати 12,7 млрд. сўмдан ортиқ бўлган 985 турдаги санъат асари (рангтасвир, сўзана, миллий тақинчоқлар, сопол, ёғочдан ишланган миллий ҳунармандлик буюмлари ва ҳоказолар) аниқланган ва хатланган.

– Қайд этилган рангтасвир ва санъат асарлари, суд ҳукмига кўра, давлат эгалигига ўтказилиб, Ўзбекистон амалий санъати ва ҳунармандлик тарихи давлат музейи, Фарғона вилояти тарих ва маданият давлат музейи, Андижон вилояти тарих ва маданият давлат музейи, Чирчиқ шаҳри тарих музейларига топширилди, – дейилади Бош прокуратура баёнотида.

Шу куни Гулнора Каримованинг фарзандлари томонидан юритилаётган Инстаграм саҳифасида раддия пайдо бўлди, унда Бош прокуратуранинг баёноти “ёлғон” дейилади.

Имон ва кичик Ислом Каримовлар ўзбек прокуратураси баёнотида онасига тегишли бўлмаган уй сурати тақдим этилганини билдирган.

«Шу боис, биз синглим билан ҳақиқий уй фотосурати ва манзилини тақдим этамиз», дейилади Каримова фарзандлари баёнотида. 

Бироқ Гулнора Каримованинг Швейцариядаги уйида илгари Ўзбекистон музейларида бўлган санъат асарларининг борлиги 2013 йилда тасдиқланган. Швейцарияда яшовчи сиёсий қочқин Сафар Бекжонов Каримованинг бўш ётган уйига кириб, у ердаги мулкларни видеотасвирга олган эди. У ўз акцияси билан ўшанда жамоатчилик эътиборини “дипломат” Каримованинг ҳашаматли уйига сарфланган пулларга қаратмоқчи бўлган эди.

Ғарб матбуотига кўра, Каримова Женева кўли соҳилидаги бу уйни 2009 йили 18 миллион швейцария франкига харид қилган. 

Жорий йилнинг 8 январь куни Тошкент шаҳри судида Гулнора Каримовага қарши қўзғатилган тўртинчи жиноят иши бўйича ёпиқ суд бошланди. Каримова давлат маблағларини ўзлаштириш ва Ўзбекистон манфаатларига зид битимлар тузишда айбланмоқда.

Аниқланишича, Гулнора Каримова «бошқа шахслар билан тил бириктириб, давлатга тегишли «Қувасойцемент» ва «Бекободцемент» пакет акцияларини пасайтирилган нархларда сотиб олган, дейилади Бош прокуратура баёнотида.

2019 йил март ойидан бошлаб Гулнора Каримова Тошкент вилоятининг Зангиота туманидаги 21-умумий режимдаги колонияда сақланмоқда. 

Тағин ўқинг
8 май 2019
Андижон шаҳар ҳокими Дилмурод Раҳматуллаев шаҳар ҳудудидаги автобекатларда савдо қилувчи тадбиркорларни бекатларда китоб савдосини йўлга қўйиш ва китоб тарғиботи ...
31 май 2017
19 май куни президент Мирзиёев Бухорода эркин сайёҳлик зонасини яратиш қарорини тасдиқлади. 2980-сонли қарорга кўра, Ўзбекистон Миллий банки масъул ...
19 март 2018
1972 йилда Ўзбекистон мустақиллигини талаб қилувчи уюшма тузгани, Совет Иттифоқига қарши курашгани учун КГБ тарафидан қамоққа ташланган Миртемир Мирабдуллаев ...
23 сентябр 2019
Адолат излаб Хоразмдан Тошкентга йўлга чиққан “Эрк” демократик партияси аъзоси, шоир ва журналист Маҳмуд Ражабнинг бу акцияси Ўзбекистонда Ислом ...
Блоглар
2 июл 2020
6-синфда ўқирдим, Кампучияда давлат тўнтариши бўлиб ҳукуматга Пол Пот раҳбарлигидаги “Қизил кхмерлар” келганини, улар бутун ...
25 июн 2020
​​Халқаро пресс-клубда матбуот анжумани бўлиб ўтибди, унда Инсон ҳуқуқлари бўйича Миллий марказ директори Акмал Саидов ...
21 июн 2020
(бўлган воқеа) Таржимон сифатида Россиянинг милиция бўлимларидан бирига чақиришган эди. Бўлимда жиноятчи сифатида гумон қилинган ...