Тошкентда наманганлик гумонланувчи қийноққа солинди

Наманган вилояти  Поп тумани Чодак қишлоғида яшовчи Дониёр Тўрахўжаев босқинчиликда гумонланган 40 яшар укаси Дилшоджоннинг 12-15 апрель кунлари Тошкент шаҳар ИИББ тергов бўлимида шафқатсиз қийноқларга солингани, оғзи ва қўллари скотч билан боғланиб, ноинсоний қийноқларга солинганини иддао қилди. Бу ҳақда у Ўзбекистон инсон ҳуқуқлари “Эзгулик” жамиятига мурожаат қилган.

Суриштирув, адвркатлар ва гувоҳлар билан суҳбатлардан сўнг маълум бўлдики, Дилшоджон Тўрахўжаев ҳақиқатан ҳам фуқаро кийимидаги жиноят қидирув бўлими ходимлари, қора махсус кийимдаги “ажал фаришталари” ва терговчилар томонидан мажбурий кўрсатма олиш мақсадида қийноққа солинган.

Ўзбекистон Республикаси ЖКнинг 251-моддасида назарда тутилган жиноятни содир этишда гумонланиб, Тоштурмада сақланаётган 29 яшар Ҳасанбой Абдунабиевга нисбатан содир этилган қийноқ натижасида у салкам ногиронга айланиб  қолди. Унинг баданига электрошокер воситасида етказилган зарар сиз кўраётган расмларда ҳам акс этган. Унинг моматалоқ баданидаги жароҳатлар ҳануз кетгани йўқ.

«Афсуски, бундай қийноқ ва зўровонликлардан ҳуқуқни муҳофаза қилиш органи тугул Қийноқларга қарши Миллий превентив механизмларни амалга оширганини иддао қилаётган Омбудсманнинг ҳам хабари бор.  Катта эҳтимол билан улар бундай жиноятларни яширишга ҳаракат қилишади, жамоатчиликни алдаш, мамлакатда қийноқларга барҳам берилган, деган ёлғон ҳисоботлар билан чиқишади.

Президент Мирзиёев 2021 йилнинг 26 июнь куни Халқаро Қийноқларга қарши кураш куни муносабати билан имзоланган Фармонида бу иллатга қарши кураш стратегияси ишлаб чиқилганди. Ҳатто Омбудсман қошида махсус гуруҳ тузилганди, аммо гуруҳ кўзбўямачиликдан нарига ўтмади.

Ҳатто Ўзбекистон Республикаси Олий суди 2022 йилда айнан қийноқ масаласида бирорта шахснинг жавобгарликка тортилмагани хусусида шубҳали маълумот берди. 

Ўзбекистон инсон ҳуқуқлари “Эзгулик” жамияти мамлакатда қийноқ ҳолатлари бўйича вазиятни таҳликали, деб баҳолайди. Ўзбекистон Республикаси Бош прокуратурасини юқорида номи тилга олинган ишлар бўйича чуқур текширувлар ўтказиш ҳамда Қийноқларга қарши миллий превентив механизмлар гуруҳи фаолиятига ҳуқуқий баҳо беришга чақиради» дея билдирилади бу юзадан «Эзгулик» тарқатган хабарда..

Мазкур хабарномада тилга олинган маълумотлар аллақачон Ўзбекистон Республикаси Бош прокуратураси, Ички ишлар вазирлиги, Ўзбекистон Республикаси Олий Мажлисининг инсон ҳуқуқлари бўйича вакили – Омбудсман, Инсон ҳуқуқлари бўйича республика Миллий маркази идораларига етиб борган. Қийноқ қурбонларининг адвокатларига кўра, бу ҳолатни яширишга уринишлар бўлмоқда.

Элтуз Ўзбекистонда Инсон ҳуқуқларининг бузилиши билан боғлиқ холатларни ёритишда давом этади. Кўрсатувларимизни кузатиб боринг каналларимизга обуна бўлишни унутманг.

@eltuz