Кадастр палатаси Қибрай филиалида коррупцион сурбетлик

Филиал бошлиғи Камолиддин Абдуллаев ўзига KIA K5 русумли машина сотиб олиб кредитни ходимларга тўлаттирмоқда.

Кадастр палатаси Қибрай туман филиали ходимларининг иддао қилишларича, Камолиддин Абдуллаев шахсий машинаси кредитини ёпишга улардан ҳар ой 11 миллион сўм миқдорида солиқ йиғиб олади.

Шунингдек, Камолиддин Абдуллаев ўз лавозимини суиистеъмол қилиб, қалбаки ҳужжатлар билан отаси Шавкат Абдуллаевга иккита ер майдони, онаси Фарида Абдуллаева номига эса битта иссиқхона ва битта турар жой учун ер майдони қайд этди.

Айни дамда ушбу ерларни расмийлаштириш вазифаси Кадастр агентлиги Қибрай тумани бўлим бошлиғи Зиёдулла Толибовга топширилган.

Инсайдерларнинг хабар беришларича, Камолиддин Абдуллаев шу ерларни расмийлаштириш учун Зиёдулла Толибовга босим ўтказиб, мажлисларда ҳақорат қиляпти.

Иддаоларга кўра, Камолиддин Абдуллаев ушбу майдонларни ота-онасига ўтказиб беришда Тошкент вилояти Кадастрлар агентлиги бошлиғи Рустам Пайзиевнинг буйруғига асосланяпти.

Юқорида келтирилган фактлар кадастр ҳужжати нусхаси ва аудио ёзув билан далилланади.

Элтуз Камолиддин Абдуллаевнинг муносабатини нашр қилишга тайёр.