Кластер ва ҳоким бирлашиб фермерни ўлдирди – АОКА эса ойни этак билан ёпмоқчи

Чуст туманида буғдой етиштириш билан шуғулланган фермер Алимардон Туморов ҳоким ва кластер босимини кўтара олмасдан юрак ҳуружидан вафот этди.

Чуст тумани ҳокими фермер Алимардон Туморовга босим ўтказиб, етиштирган буғдой ҳосилини Арт Софт МЧЖ кластерига топширишга мажбурлаган. Арт Софт кластери тўловларни жуда кечикиб амалга оширади, шу сабабдан фермер ушбу кластерга ҳосилни беришдан бош тортган. Бу ҳақида фермер бир неча ҳафта олдин видеомурожаат билан чиққан –  мурожаат Kun.uz нашрида эълон қилинган.

Эндигина 45 ёшга кирган фермер Алимардон Туморов 3 июл куни юрак ҳуружи натижасида вафот этди.

“Узбек форум” фаолларидан бири Kun.uz эълон қилган видеомурожаат ҳаволасини Х (твиттер) ижтимоий тармоғида бўлишди. (Ўзбекистон Президенти Администрацияси қошидаги) Ўзбекистон Ахборот ва оммавий коммуникациялар агентлиги эса твиттердан ушбу видеони ўчиришни талаб қилиб, бу қонунчиликка зид ахборот эканини билдирган. Ўзбекистон ОАВида эълон қилинган мурожаатни тарқатиш қандай қонун, қайси қонунчиликка зид экани айтилмаган. Зотан видео лавҳа Kun.uz дa эълон қилинган, Узбек форумнинг эксклюзив материали эмас.

Ўлимидан олдин йўллаган видеомурожаатида фермер Алимардон Туморов ер солиғи, сув солиғи, даромад учун алоҳида солиқ тўлашини, ишчиларга ойлик сифатида буғдой беришни ваъда қилганини айтади. Видеода ишчилар фермер ёнида турган, фермер шу ишчиларга мўлжалланган буғдойни Арт Софт тортиб олаётгани ҳақида арз қилади. Фермернинг юраги бу ноҳақликни кўтара олмади.

Фермер ўз ҳосилини, ишчилари ҳақини сақлаб қолиш учун ёрдам сўраган, жон талашаётган бир пайтда Ўзбекистон Ахборот ва оммавий коммуникациялар агентлиги (худди қиларга бошқа иши йўқдек) Сан Францискодаги Твиттер бош офисига мактуб йўллаб видеони ўчиришни талаб қилди.

Элтуз Ўзбекистонда фермерларга бўлаётган босимларга оид воқеаларни ёритишда давом этади. Каналимизга обуна бўлинг, видеоларимизга лайк қолдиринг. Агар каналдаги айрим ёпиқ видеоларни кўрмоқчи бўлсангиз супер рахмат, супер спасибо тугмачасини босиб бизни қўлланг.