Асосий мавзулар
21 сентябр 2018

Бодроқ каби урчиган порахўрлик

Сўнгги кунлардаги хабарларни ўқиб, Ўзбекистонда ҳокимият идораларидаги порахўрликка қарши кескин кураш бошланганга ўхшайди, деган хаёлга бориш ҳеч гап эмас.

Бундай мулоҳазага ундайдиган мисоллар ҳам кўпайиб кетди охирги кунларда. Ҳазилми ахир, куни-кеча Бойсун тумани ҳокимининг ўринбосари 100 доллар билан ушланганди. Бунга йўлдош бўлиб Андижон шаҳри ҳокимлиги амалдори 16 минг “кўки” билан қўлга тушди.

Ҳозирча амалда эканлигигида порахўрликда айбланиб ушланганлар орасида энг йирик амалдор Самарқанд вилоятининг эндиликда собиқ ҳокими Туроб Жўраев бўлиб турибди.

Унинг қамоққа олингани анча шов-шув бўлди. Лекин бу иш жараёни қандай бораётгани ҳақида сўнгги вақтларда бирорта янги хабар чиққани йўқ.

Бундан аввалроқ Тошкент шаҳрининг янги ҳокими (в.б) Жаҳонгир Ортиқхўжаев “менинг командамга пора керак эмас” қабилида гапирган эди.

Пойтахтнинг Юнусобод тумани ҳокими Бахтиёр Абдусаматов кутилмаганда 400 минг доллар пора билан қўлга тушиб қолди.

Тўғри, унинг Жаҳонгир Ортиқжўжаев командасига қанчалик алоқадорлиги ҳозирча номаълум. Алоқадорлигидан кўра алоқадор эмаслиги кўпроқ ҳақиқатга ўхшайди.
Лекин унда бу амалдор кимнинг командасидан экан? Мана шу саволга жавоб топилса, кўпчиликнинг кўнглидаги иш бўларди.

Юқорида Андижон шаҳри ҳокимлиги амалдори пора билан ушланганини эслатдик. Лекин бор-йўғи ҳокимликнинг катта мутахассиси лавозимида ишлаган шахс бу пора олиш занжирида ҳал қилувчи роль ўйнаш даражасида эмаслигини сал ақлини ишлатган одам билиб олиши қийин эмас.

Бу ўринда арқоннинг бир учини сал тепароқдан излаган мантиқлироқ бўлади назаримизда.

Айтганча, Андижоннинг ҳокими кенг интернет ва бошқа жамоатчиликларга сўконғичлиги боис отнинг қашқасидек таниқли бўлиб қолган шахс.

Баъзи манбаларда унинг яқин-яқинларгача Давлат солиқ қўмитаси раиси лавозимида ишлаб келган қудратли Ботир Парпиевга алоқадорлиги сўнгги вақтларда бот-бот тилга олинмоқда.

Сўконғичлиги боис ҳатто маъмурий жавобгарликка тортилгандан кейин ҳам бу одатини тарк қилмаётган Андижон ҳокими ҳақида аввал ҳам ёзгандек.

Унинг ортида қудратли кучлар турмаганида бу оғзи шалоқ ҳоким бот-бот одамларни сўкавермасди, деган мулоҳазага ҳам боргандик.

Ортида турганлар энди маълум бўляпти. Қолаверса, Ботир Парпиев тўдасига алоқадор амалдор бошқараётган жойларда порахўрлик бўлмаслигига кафолат берадиган мардни топиш қийин.

Андижон ҳокимлиги бош мутахассисининг пора олиш чоғида ушлангани ҳақида хабар берган интернет нашрларидан бири “ДХХ қозонда борини кўрсатяпти”, деганга ўхшаш қочирим қилди.

Айтиш мумкинки, бу “қозон”да ҳали кўп нарса бор. Ҳокимият қароқчилиги авжида чиққан йилларда бу “қозон”га нималар солинмади дейсиз.

ДХХ тимсолидаги чўмичга ҳали кўп нарсалар илиниб чиқмаётир. Чиққанидами, қиёмат қойиб бўларди Ўзбекистонда!

Чунки коррупцияга қарши шунча гап-сўзларга, баъзан реал саъй-ҳаракатларга қарамай, бу порахўрлик ботқоғини ҳали қуритишга жуда кўп куч сарфлашга тўғри келади.

Бунинг учун эса улкан сиёсий ирода керак. Ҳокимият тизимидаги амалдорларнинг пора билан қўлга олинаётгани ҳақидаги бодроқдек чиқаётган хабарлар бу сиёсий ирода аста-секин бўй кўрсатаётганига ишонтира олса эди…

Сардор Азим
Eltuz.com

Тағин ўқинг
11 декабр 2018
Тошкентда 10 декабрь куни «Ижтимоий медиа маҳсулотлари» тадбирида «Би-Би-Си» ўзбек хизмати «Ўзбекистон дўстлари» дипломи билан мукофотланди. Тадбирда диплом ва ...
9 апрел 2018
Бу йил баҳорга чиқиб Тошкентда пиёз хор бўлди. Айрим маҳаллаларга, кўп қаватли уйлар орасидаги ариқларда қоп-қоп тўкиб ташланган пиёзни ...
13 декабр 2017
Ўзбекистондаги мактаб ўқувчиларига дарсхоналарни иситиш учун ўтин солиғи солинмоқда. Жумладан, «Элтуз»нинг Андижондан олган хабарига кўра, шаҳардаги 29-мактаб ўқувчиларига кўмир ...
30 ноябр 2020
Президент Шавкат Мирзиёевнинг тиббиёт тизимини тубдан қайта қуришга қаратилган топшириғи ортидан ҳали касбини тўлиқ эгаллаб улгурмаган талабалар гўёки амалиёт ...
Блоглар
17 март 2024
Рассом Туз бир мавзу муҳокамасини бошласа ағдар тўнтарини чиқариб барча қирраларини ўрганади. Танганинг ағиниям¸ бағиниям¸ ...
14 феврал 2024
«Ёшлар» телеканалида содир бўлаётган коррупция олдида «Спорт» телеканали директори Зоҳид Каримов қўй оғзидан чўп ололмайдиган ...
13 феврал 2024
Тармоқнинг ўзбек сегменти ўзбек давлат рамзларига нафратни парваришламоқда. Ижтимоий тармоқларда маҳалла раиси ва фаолларнинг давлат ...