Асосий мавзулар
15 январ 2019

Президент берган пулга “Малибу” оламан!

Самарқандга ташрифи чоғида Ўзбекистон президенти Шавкат Мирзиёев янги солиқ сиёсати доирасида жорий йил якуни бўйича республикада 5,5 трлн сўм маблағ маҳаллий бюджетларга қолишини билдирди.

“Пул бўлса, ривожланиш бўлади”, деган президент Самарқанддаги ҳокимлик йилларини эслаб, марказий ҳукуматдан маҳаллий бюджетга пул ундиролмаганини айтди.

Давлат раҳбари маҳаллий бюджетга пул тушса, туманларда катта-катта корхоналар очилиши, йўллар яхшиланиши, шифохона, мактаблар қурилиши, чироқ ва кўмир мўл бўлишини эътироф этди.

“Мактабларда парта йўқ, одамларнинг томидан сув ўтиб ётибди, чироқ йўқ. Буларга кўз юмиб бўлмайди”, деган президент: “Мен ҳам Самарқандга ҳоким бўлганман, кўп ҳаракат қилардик, қўшимча ҳам ишлардик, лекин пул берилмасди. Ишлаган ҳам бир даражада, ишламаган ҳам бир даражада эди. Бунақада рақобат бўлмаса, ривожланиш бўлармиди”, дея қўшимча қилди.

Давлат раҳбари солиқ тушумларининг бир қисмини маҳаллий бюджетга қолдириш орқали ана шундай эзгу ниятларни кўзлаяпти.

Президент нутқидан англашиладики, у шу орқали ҳудудлар иқтисодиётини ўнглаш, аҳоли турмуш даражасини яхшилашни кўзламоқда.

Бундай сиёсат мустақил Ўзбекистон тарихида илк амалиёт. Бу амалиётнинг илк кўринишлари эса маҳаллий ҳокимиятларнинг, аввало, халқ эмас, балки ўз манфаатларини кўзлашини яна бир бор исботлади.

Навоий вилояти ҳокими Қобул Турсунов президент ташаббуси билан маҳаллий бюджетга қолган пулларга “Малибу” русумли янги машиналар олишдан ишни бошлади.

У ҳар бири, ўзининг айтишича, акция доирасида 267 миллион сўм турадиган 8 та янги “Малибу” олди. Машиналарнинг 5 таси унинг ўринбосарларига, биттаси шаҳар ҳокимига, қолган иккитаси вилоят фавқулодда вазиятлар бошқармаси ҳамда давлат солиқ бошқармаси раҳбарларига бериладиган бўлди.

“Президент Ш.Мирзиёев маҳаллий ҳокимларга бюджетга тушадиган тушумларни ўз ихтиёрлари билан ишлатиш ваколатини бергач, бундай машиналарни олишга имконият пайдо бўлди”, деди вилоят ҳокими.

Ҳоким бу қарорини вилоятнинг катталиги, хориждан келаётган юқори мартабали меҳмонлар учун люкс машиналар етишмовчилиги билан изоҳлади.

Аввало, бир фикр. Вилоятнинг чекка ҳудудлари йўллари учун “Малибу”лар ярамаслиги кўпчилик билади. Ўйдим-чуқур йўлларда таги паст (нуфузи эмас) бундай машиналар бир тийинга қиммат. Агар ишонмасангиз, шундай йўлларда юрадиган ҳайдовчилардан сўранг. Шунинг учун ҳокимбуванинг бундай ўзини оқлаши пуч.

Келаётган хорижлик меҳмонларни арзонроқ машиналарда олиб юрса ҳам биров урушмаса керак. Саналган амалдорлар оддийроқ машинага минса, орқаси оғриб қолмас.

Қолаверса, ҳокимбуванинг иштаҳаси Россиядаги вилоят губернаториникига тортадиган даражада. У дотацияда ўтирадиган губернатор отахоннинг ўз хизмат самолёти, вилласи, биздагидан 8 баробар қиммат турадиган антиқа машинаси борлигини оғзидан сўлаги томиб гапирган.

Бу ёқда президент ҳокимлар ўзини эмас, халқни ўйлаши кераклиги ҳақида гапираётган бир пайтда шу халқнинг пулига 8 та “Малибу” олган ҳоким: “Менимча, бу ерда халқ ёки давлатнинг қандайдир манфаатига путур етадиган ҳаракат содир этилмаган”, деб кўзини лўқ қилиб турибди.

Навоийда таъмирталаб шифохона, мактаб, боғча йўқми? Юрганда машина эмас, пиёданинг ҳам оёғи синиб кетадиган даражада хароб йўл йўқми? Уйга, ҳаттоки нонга муҳтож хайрияталаб инсонлар йўқми?

“Малибу”лар учун сарфланган 2 миллиард сўмдан ортиқ пулга муҳтожлар учун нечта уй қурса бўларди? Қанча йўл, мактаб, шифохона, боғчани таъмирлаш мумкин эди?

Солиқ тушумларининг бир қисмини маҳаллий бюджетларга қолдириш ташаббуси илғор мамлакатлариникига менгзагулик. Буни фақат қўллаб-қувватлаш керак.

Лекин Ўзбекистоннинг йиллар давомида халқнинг эмас, фақат ўз манфаатини ўйлаган амалдорлари бундан ҳам ўз манфаатлари йўлида фойдаланишни кўзлаётгани Навоий вилояти мисолида кўринмоқда.

Шунинг учун маҳаллий бюджетларга қоладиган маблағларни ишлатишнинг шаффоф, халқ олдида ҳисобдорлик механизмини яратиш бугунги кунда янада долзарблашади.

Акс ҳолда япалоқ тошнинг ялтирашига ҳавас қиладиган, рус губернаторининг ҳашаматларига кўнги суст кетадиган ҳокимбувалар сони кўпайиб кетаверади.

Сардор Азим
Eltuz.com

Тағин ўқинг
22 май 2017
“XXI аср” газетасининг (18.05) “Тараққиётнинг янги модели ёки “йўлбарс шиддати”га шайланаётган мамлакат” мақоласидаги иддаога кўра шундай. Мақолада Жанубий Корея, ...
5 июл 2019
Юсуф Жума 1958 йилда Бухоро вилоятининг Қоракўл туманида таваллуд топган. Бухоро педагогика институтини тамомлаган. Биринчи шеърий тўплами “Ҳақиқатнинг олтин ...
27 апрел 2016
Гап Ўзбекистонда анча вақтдан бери давом этаётган бензин тақчиллиги муаммоси ҳақида бормоқда. Бугун бензин фақат Тошкентдагина бир амаллаб топилаётгани, ...
27 август 2018
Швециянинг Telia трансмиллий коммуникация компанияси собиқ бошқарувчилари 4 сентябр куни Ўзбекистоннинг марҳум президенти Ислом Каримовнинг қизи Гулнорага пора беришгани ...
Блоглар
27 январ 2021
Элтуз қисқа ҳажвий анимацион фильмлар туркумини давом эттиради. Навбатдаги фильмда бульдозер дарахтзорни суриб ташлайди ва ...
18 январ 2021
Бор эканда йўқ экан, оч эканда тўқ экан, яқин-яқин замонларда ёт босқинчиларнинг юз йилдан кўпроқ ...
13 январ 2021
Кun.uz профессионалларни ишга қабул қилар эмиш. Катта маош, икки маҳал овқат. Сиҳатгоҳнинг ўзи-я! Бундай ишхонани ...