Асосий мавзулар
2 декабр 2019

Қишга тайёргарлик: саботажми ёки ҳукуматнинг нўноқлиги?

Бу йил Ўзбекистонда қишга тайёргарлик ҳатто ўтган йилдагидан ҳам ёмонроқдир. Бу тегишли идораларнинг саботажими ёки ҳукуматнинг навбатдаги нўноқлигими?

“Саботаж қилиняпти дейиш бирмунча оғирроқ айб. Аммо бу йил ҳали ҳақиқий қаҳратонлар бошланмай туриб, на электр, на газ таъминотида олдинга силжиш кузатилмаётгани ҳукумат қишга тайёргарликда жиддий камчиликларга йўл қўйганини кўрсатади”, деди соҳа вакилларидан бири “Элтуз” билан суҳбатда.

Унинг сўзларига кўра, жорий йилда ҳатто расмий маълумотлар ҳам айнан шундай ҳолатдан дарак беради. Мамлакатнинг кўплаб ҳудудларида ток ўчиб қолиши, газ йўқлиги оддий ҳолатга айланиб қолди. 

Яқинда бош вазир Абдулла Арипов раислигида ўтказилган ҳукумат йиғилишида энергетика вазири Алишер Султонов халқни “кўп энергия исроф қилаётганлик”да айблади. 

“Бу очиқчасига ўзи масъул бўлган соҳадаги камчиликларни хаспўшлашдан бошқа нарса эмас. Чунки йўқ газ ва электр энергиясини қандай қилиб исроф қилиш мумкин”, дейди “Элтуз” билан суҳбатлашган соҳа вакили.

Шу ўринда эслатиш керакки, бу амалдорларнинг навбатдаги қовун туширишидир. Бундан аввалроқ Ўзбекистон фермер, деҳқон хўжаликлари ва томорқа ер эгалари кенгаши раиси халқни кўп гўшт еяётганликда айблаганди. 

Кейин эса Халқ демократик партияси раҳбари 2,5 миллион сўмга Тошкентда 5 болали оила бемалол яшаши тўғрисида лоф урганди.

Алишер Султоновнинг гаплари эса жафокаш ўзбек халқи шаънига айтилган яна бир ўхшамаган айблов бўлди. 

Аслида унинг қўл остидагилар яқиндан буён халқ билан “шаффофлик ўйини” ўйнашни бошлаб юборган. Улар Ўзбекистоннинг гоҳ у ҳудудида, гоҳ бу ҳудудида фалон соатдан фалон соатгача электр энергияси бўлмаслиги тўғрисида хабар беришни урф қилишди.

Бандаи мусулмонлар, Ўзбекистоннинг Тошкентдан бошқа қайси ҳудудида мунтазам равишда электр таъминоти йўлга қўйилган?

Икки-учта ҳудудда ток бўлмаслиги ҳақида олдиндан огоҳлантириш бериш халқнинг устидан кулиш эмасми? Нега Ўзбекистоннинг ярмида ток бўлмайди, умид ҳам қилманглар, деб очиқчасига айтилмайди?

Бу очиқдан очиқ кўзбўямачилик бўлмай нима? Кимнинг устидан куляпмиз? Бу қачонгача давом этади? 

Газ ва электр таъминотидаги узилишлар халқимизнинг бошига битган бало бўлгани сир эмас. Бутун-бутун оилалар қишнинг илк кунларидаёқ исиниш ташвиши ортидан ис газидан ҳалок бўлмоқда, заҳарланиб, касалванд бўлиб қолмоқда.  

ОАВ хабарларини кузатинг, ис газидан заҳарланиш билан боғлиқ ҳодиса юз берганига оид хабар чиқмаган кун борми? Бунинг ортидан кимдир ўлгани, кимдир шифохонага ётқизилгани айтилмаган кун-чи?

Хуллас, аҳволимиз жуда хароб. Ҳукумат ҳам буни тан олиб турибди. Шунинг учун Туркманистондан электр сотиб олишни бошлади. 

Бу ҳам яхши янгилик. Энди ўзимизнинг газни Хитойга сотиб, қишда туркман газини сотиб олиш тўғрисида келишувга келишимиз керак.

Бу истеҳзо эмас. Зеро, Хитой билан шартномамиз бор. Газ бермай иложимиз йўқ. Биттаю битта имкон – қиш фаслида туркманлардан газ харид қилиш борасида келишувга эришиш.

“Ҳозирги ҳолатимизда бу муаммони ечишнинг нисбатан тезроқ ҳал бўладиган, нисбатан оқилона йўли. Чунки газ муаммосини тезда ҳал қила олмаймиз. 

Қазиб чиқаришни кўпайтириш, қувурларни модернизациялаш, энергия тежамкор технологияларни жорий этиш учун катта миқдорда инвестиция керак. 

Афсуки, инвестицияларнинг ўсиш суръати ва талаб ўртасидаги фарқ жуда катта. Ҳали қилиниши керак бўлган ишлар кўп”, деди соҳа вакили “Элтуз” билан суҳбатда.

Eltuz.com

Тағин ўқинг
2 ноябр 2015
2015 йилнинг 8 – 9 июля Женевада Инсон ҳуқуқлари бўйича БМТ Қўмитасининг кенгаши бўлиб ўтди, унда Ўзбекистондаги вазият муҳокама ...
21 май 2017
Туркиянинг Истанбул шаҳри Фотиҳ тумани Қумқопи маҳалласида 35 яшар Ўзбекистон ватандоши Дилдора Иномовани ўлдириб жасадини мусорга ташлаган муҳтамал қотил ...
11 июл 2019
Гулчеҳра Нуриллаева 1938 йилда Тошкент вилоятида туғилган. Тошкент давлат университети ва Москвадаги Олий адабиёт курсларида таҳсил олган. 15 дан ...
8 ноябр 2016
7 ноябр куни Арманистон республикаси Омбудсмани Арман Татоян Ўзбекистонлик ҳамкасби Улуғбек Муҳаммадиев номига мактуб йўллади. Бу арман омбудсмани томонида ...
Блоглар
4 декабр 2019
(Муҳаммад Солиҳ ва Нуруллоҳ Муҳаммад Рауфхон суҳбатларини тинглаб) 1980 йиллар бошида раҳматли отам Мадамин Бек ...
27 ноябр 2019
Ўзбекистон Бош прокуратураси Тошкент шаҳри ҳокими Жаҳонгир Ортиқхўжаевнинг ижтимоий тармоқда тарқалгани аудиоёзувидаги ҳолатларни текшириш юзасидан ...
19 ноябр 2019
Матбуот хизматлари ва жамоатчилик билан алоқалар соҳаси бўйича таҳлиллар рукнимизнинг янги сонига катта эҳтиёж пайдо ...