Асосий мавзулар
10 октябр 2018

Жиззах: Оммавий мажбурий меҳнат хроникаси


Жиззах вилояти пахта далаларида 3-4 октябрь кунлари мониторинг ўтказган ҳуқуқ фаоллари вилоятнинг Арнасой, Дўстлик ва Пахтакор туманларида бюджет идоралари ходимлари, ўқитувчилар ва талабалар пахта тераётганига гувоҳ бўлишди.

Вилоятга мамлакатнинг турли туманларидан келган теримчилар саҳарги 4 дан уларни олиб кетиш учун келадиган автобусларни кутишга чиқишади. 

Кун бўйи даладаги оғир меҳнатдан сўнг эса тунги соат 24 гача давом этадиган селектор йиғилиши олиб узатилаётган радиокарнай олдида тўпланишади.

Пахтага терими ўта қатъий тартибда жорий этилган 

Ҳуқуқ фаолини тумангаз ходими сўроққа тутди

Ҳуқуқ фаоллари Ички ишлар академиясининг 3-курс талабалари тумангаз биносида ва ҳовлисида қурилган чодирларга жойлашганига гувоҳ бўлишди.

Малоҳат Эшонқулованинг «Элтуз» нашрига билдиришича, далада ўрнатилган яшил чодирларни суратга олаётган ҳуқуқ фаоли Елена Урлаевани тумангаз ходимлари тўхтатиб сўроққа тутишган, ҳудудда юриши ва тасвирга олишини тақиқлашган.

Айрим теримчилар мажбурий меҳнат мониторингм фаолларига шубҳа билан қарашади

Ички ишлар академияси талабалари пахта теришмоқда

Суҳбат жараёнида курсантларнинг саҳар соат 5 дан пахта даласига автобусларда олиб кетилиши ва тунги соат 21.00 ларда қайтиши маълум бўлган.

Шунингдек, курсантларга кунлик норма 100 кг қилиб белгиланган. Бир кунда 100 кг тера олмаган курсантлар ота-онасидан пул олиб, маҳаллий аҳолидан пахта сотиб олиши аён бўлган.

Теримчиларга нонушта тайёрлаш олдидан

Академиянинг 80 нафар ўқитувчиси ҳам пахтада 

Арнасой туманида талабалардан ташқари Ички ишлар академиясининг 80 нафардан ортиқ ўқитувчиси ҳам пахта теримига жалб этилган. 

«Масалан, уларнинг раҳбари подполковник Алишер Ўзбековни биз касал ҳолида дорихона қидириб юрганида учратдик. Шу алфозда кекса подполковник пахта штабида юришга мажбурланмоқда. Алишер Ўзбеков ИИВ академиясидан жами 2000 нафар курсант келтирилганини маълум қилди. Улар орасида 1,2,3-курс талабалари бор”, дея билдирди «Элтуз» нашрига Эшонқулова.

Теримчилар нонушта пайти

Йўл қурилиши идораси, Фарғона заводи ишчилари ҳам Жиззахда пахта термоқда

Йўл қурилиши идорасида ишловчи Одил исмли ходимнинг ҳуқуқ фаолларига билдиришича, йўл қурувчилар ҳам 7 кун давомида пахта теримига мажбуран жалб этилган, ким пахта теримига чиқмаса, ишдан ҳайдаш билан қўрқитилган.

Бундан ташқари, Фарғона кимё саноати заводидан келган Шерзод исмли йигит 4 ой олдин завод маъмурияти томонидан Арнасойга юборилгани ҳақида ҳикоя қилди. Кимё заводининг қолган асосий ишчилари фақат пахта терими учун Арнасойга олиб келинган.

Аҳоли билан бўлган суҳбатлардан талаба ва курсантлар Арнасойдаги 16- совхозда, электр тармоқлари биносига, шунингдек, туман марказидаги маданият уйига жойлаштирилган.

Теримчилар орасида турли касбдаги, ёшдаги одамларни учратиш мумкин

Туман ҳокимлигидаги тунги селектор йиғилиши

Ҳуқуқ фаоллари Арнасой тумани ҳокимлигида пахта-йиғим теримининг боришига бағишлаб вилоят ҳокими ўринбосари Рустам Холматов тунги 23.00 га қадар ўтказган селектор йиғилишида ҳам қатнашишган. 

Радиоузел орқали эшиттирилган йиғилишда пахта теримининг бориши, қайси отряд қанча пахта тераётганлиги, бир кунда отрядларга жами қанча миллион сўмлик маблағ овқат учун сарфланаётганлиги ҳақида тўхталиб ўтилди. 

Ҳуқуқ фаоли Малохат Эшонқулова селектор йиғилиши олдидан теримчиларга мажбурий меҳнатга қарши буклетлар тарқатмоқда 

Саҳарги соат 4 дан автобусларда пахта даласига 

Ҳуқуқ фаоллари тунни Арнасой тумани марказида яшовчи фуқаролардан бирининг хонадонида ўтказишган.

Улар талабаларнинг тонгги соат 4 да пахтага автобуслар олиб кетадиган майдонда йиғилишига ва соат 5 ларда уларнинг пахта далаларига олиб кетилишига гувоҳ бўлишган.

Автобус йўлкираси ҳам теримчилар ҳисобидан ундирилади

Бошқа вилоятлардан ҳам теримчилар келтирилган

Жиззах вилоятининг Арнасой тумани Ички ишлар вазирлиги томонидан оталиққа олингани боис, ҳудудга турли вилоятлардаги ички ишлар бўлимларидан 50 – 100 нафардан ходим жўнатиш буюрилган.

Милиция ходимлари эса ўз ўрниларига ойига 900 минг сўмдан одам ёллаб жўнатишган, шу боис ёлланганлар орасида пул ишлаш мақсадида келган кўнгиллилар ҳам бор. 

Ҳуқуқ фаолларининг ўрганишича, теримчилар Самарқанд, Қашқадарё, Навоий каби вилоятлардан келтирилган, улар учун ҳам бир кунда 100 кг пахта териш норма сифатида белгилаб қўйилган.

Теримчилар ётоғи

Маданият уйи биносида нонушта 

Ҳуқуқ фаоллари Арнасой тумани марказидаги маданият уйи биносида ИИВ академияси курсантларига нонушта тайёрланаётганини кузатишган.

Овқат пули учун теримчилардан кунига 10 килограмм пахтанинг пули ушлаб қолинар ва ҳар куни далага чиқиш учун автобусга ҳар бир теримчи 2 минг сўмдан тўлакан.

Тумангаз, электр тармоқлари, маданият уйи биноларида жойлаштирилган ИИВ академияси домлалари ва курсантларидан фарқли ўлароқ, ИИБ ходимларининг ўрнига пулга ёлланганлар туман марказидаги аҳолининг уйларида кунига 3 минг тўлаш эвазига ижарага жойлаштирилган.

Айримлар атай пул ишлаш учун пахта теримига ёлланишган

Пахта далалари сари поездда

Ҳуқуқ фаоллари вилоятнинг Пахтакор тумани маркази темир йўл станциясида тонгги соат 4.30 да Сурхондарёдан кўрпа-тўшаги билан келиб тушган 1300 нафар ҳашарчининг транспорт кутиб турганига гувоҳ бўлишган. 

Ҳашарчилар ИИБ ходимларининг ўрнига пулга ёлланиб келганлигини билдиришган. 

Бир ярим соатлик кутишдан кейин йўл-патруль хизмати ходимлари кузатувида 20 дан ортиқ автобус келган.

Шунингдек, ҳуқуқ фаоллари вилоятнинг Дўстлик, Пахтакор ва Арнасой туманлари кўчаларида мажбурий меҳнат тақиқига оид катта банерлар ўрнатилганини кўришган.

Eltuz.com

Тағин ўқинг
10 октябр 2015
Ўзбекистонда одамларнинг қулларча мажбурий меҳнатга жалб этилгани ҳақидаги хабарлардан кейин, ҳар сафар бу хабарларни етказганларга қарши кампания ташкил этилади. ...
13 август 2019
Таниқли жаноб Алламжонов раҳбарлик қиладиган Ўзбекистон Президенти маъмурияти ҳузуридги Ахборот ва оммавий коммуникациялар агентлиги тағин айбловлар билан «Озодлик»ка хуруж ...
8 сентябр 2018
«Ўзбекконцерт» қошидаги бадиий кенгаш 5 сентябрь куни бир қанча ўзбек артистлари клипларини маҳаллий ТВ каналларида кўрсатишни тақиқлади. Улар ичида ...
11 март 2023
1990 йилнинг 11 мартида Литва парламенти давлат мустақиллиги тиклангани ҳақидаги актни тасдиқлади. 80-йилларда Болтиқбўйи мамлакатларида бошланган миллий озодлик ҳаракатлари ...
Блоглар
28 май 2024
Мен миллатчи эмасман! Лекин қайтадан таъмирлатилган ва Тошкент шаҳрининг собиқ ҳокими Ж. Ортиқхўжаев томонидан Пасхага ...
11 май 2024
1944 йилнинг 11 майида Сталин барча қрим татарларини Қримдан сургун қилиш ҳақидаги машъум қарорни имзолади. ...
6 май 2024
Ҳайрли кун! Урганч шаҳрида яшайман. Бугун қуйидаги воқеа юз берди: мен автобусда телефонда гаплашиб тургандим. ...