Кўзқараш
24 июл 2017

Ғафур Раҳимовмас, сиёсий диссидентлар юртга қайтиши керак

Халқ орасида йирик ишбилармондан кўра кўпроқ криминал авторитет сифатида танилган Ғофир Раҳимовнинг туғилган куни муносабати билан интернетда у ҳақда кўплаб мақолалар берилмоқдаки, кампаниябозликнинг ҳиди келади. Фото: 1991 йил, депутат Насрулло Саййид Давлат байроғини тақдим қилиш тадбирида.

Бу мақолалар муаллифлари орасида зиёли, таниқли журналист ва ёзувчилар қаторида ҳатто бир вақтлар Ислом Каримовга, энди эса амалдаги президентга маддоҳлик қилаётган шахсларни ҳам учратасиз.

Ғафур Раҳимовнинг криминал фаолияти ҳақида ABC news канали тайёрлаган филмдан скриншот

Бу мақолаларни бир нуқта бирлаштириб туради. Уларнинг ҳаммасида Ғофир Раҳимов жасур ва мард халқ манфаатини ўйлайдиган, қўли очиқ, адолатли инсон сифатида таърифланади.

Бизнинг бу таърифларга ва таъкидларга эътирозимиз йўқ. Агар мақолалардаги гаплар ҳақиқатан ҳам рост бўлса, бу каби инсонларнинг қадрига етиш, эзгу ишларини тарғиб қилиш ўринли бўлади.

Қолаверса, Ғофир Раҳимов шахси, унинг фаолияти ҳақида турлича қарашлар мавжудки, очиқдан-очиқ “пахтакор”лик қилаётган зиёлиларимиз ҳайбаракаллачилик денгизида сузаётганда тарозининг палласига кўз ташлаб қўйса, фойдадан холи бўлмайди.

Масаланинг бошқа жиҳати ҳам бор. Нега биз халқимиз, ватанимиз учун ундан ҳам кўра фойдалироқ бўлиши мумкин бўлган, айни пайтда муҳожиратда яшаб, юрт ҳавосига, тупроғига зор қолаётган бошқа таниқли шахсларнинг Ўзбекистонга қайтиши талаби билан ана шундай кампаниялар уюштирмаяпмиз?

Исми биз айтмасак ҳам элга машҳур юртдошларимиз ҳисобланмиш мухолифат етакчилари мард, жасурлигини кўрсатмаганми, ватан манфаатини Ғофир Раҳимовдан камроқ ўйлаганми ёки улар шу юрт учун ундан қолишмайдиган ишлар қилмаганми?

Насрулла Саидов ватанга қайтишга рухсат беринг, деб қон йиғлаб юрибди. У юқорида биз ишора қилган шахслар каби катта мавқега эга бўлмаса-да, ўз юрти учун қайғурган, қайғуряпти, халқимга ёрдамим тегсин, деб ўзини ўтга-чўққа урган.

Каримов тахтдан кетса, мен учун ватанга йўл очилади, деб умид қилган Юсуф Жума ҳали ҳам АҚШдан юртига қайта олгани йўқ.

Авторитар режим зуғуми туфайли Ўзбекистонга кела олмаётган машҳуру номашҳур юзлаб, минглаб ана шундай зиёлилар, ишбилармонларимиз бор.

Тўғри, уларнинг ватанимизга қайтишига йўл очиш чақириғи билан бир-иккита мақолалар берилди. Афсуски, улар сони криминал авторитет ва ишбилармон ҳақидаги мақолалар миқдори олдида урвоқ ҳам бўлмайди.

Ўзбекистон ўзгаришларга юз бураётган айни даврда мана шу ватандошларимизни юртга қайтишига йўл очиш чақириқларини ҳам оммавий кампания даражасига чиқариш вақти етмадимикин?!

Ғофир Раҳимов Ўзбекистонга қайтса, иқтисодиётни, спортни ривожлантириш учун балки ёрдами тегар. Лекин унинг сиёсий ўзгаришларга очиқча бош қўшишига ишонадиганлар кам.

Чунки у бошқа тоифадаги инсон. У, кампаниябозликка йўғрилган мақолаларда ҳам таъкидланганидек, ишбилармон. У бизнеси учун ҳар қандай режим билан тил топишиб кетаверади. Бу режимнинг йўриғига юрса бас.

Сиёсий ўзгаришлар ҳақида талаблар қўя оладиганлар эса бошқа тоифа. Бугун Ўзбекистон ана шундай тоифанинг (булар сафига турли радикал қарашдаги, конструктив мулоқотга тайёр бўлмаганларни қўшиш фикридан йироқмиз) қайтишига муҳтож.

Ғофир Раҳимов ҳақида ёмғирдан кейинги қўзиқориндек кўпайган мақолаларни ўқиб, ана шундай фикрлар уйғонди…

Жасур Сардор
Ўзбекистонлик ҳамкорнинг тахаллуси
Eltuz.com

Тағин ўқинг
23 декабр 2016
Чилонзор тумани “Тинчлик” масжидининг имом хатиби Шермурод Тоғай (Алишер домла) ўзининг Муниса Ризаева ҳақидаги чиқиши юзасидан ёзилган танқидий муносабатга ...
1 феврал 2016
Режиссер Саид Мухторов, “Хиёнат гирдоби” фильми туфайли анча обрў топди, матбуот назарига тушди. Чунки, фильм триллер жанрида бўлиб, ўзбек ...
17 март 2017
«Ўзбекистон “Миллий тикланиш” демократик партияси ташаббуси билан Бухородаги марказий кўчага Ислом Каримов номи берилди”, дея тантанавор эълон қилди “Миллий ...
8 октябр 2019
Ўзбекистон қаҳрамони, шоир Абдулла Ориповга Нимасан? Қандайин сеҳрли кучсан?Нечун томошага бунчалар ўчсан? Ҳурматли Абдулла ака, ушбу хатимда сизнинг бир ...
Блоглар
11 декабр 2019
Кун ўтмоқда, сана ўзгармоқда, лекин ижобий ўзгаришлар рўй бермаяпти. Мен Одил Элмурод, ”Эзгулик” инсон ҳуқуқлари ...
10 декабр 2019
Ўзбекистон мусулмонлари идорасида раис ўринбосари бўлиб ишлаган Дилшодбек Ҳошимов ушбу муассасага Жаслиқ қамоқхонаси мулозимлигидан келган ...
9 декабр 2019
Абдували Қутбиддин 8 декабрь куни 59 ёшида Тошкентда вафот этди. Замондошлари наздида у ўзбекнинг далли ...