Алишер Илҳомов: Ёмон ва жуда ёмондан бирини танлаш керак

Лондондаги Шарқ ва Африка тадқиқотлари институти таҳлилчиси Алишер Илҳомов фейсбук саҳифасида Президент Шавкат Мирзиёевнинг Ўзбекистон Миллий гвардияси қўмондони
Баҳодир Тошматовга генерал-полковник унвонини бергани ҳақидаги хабарни бундай шарҳлади:

«Мудофаа вазирига генерал-лейтенант унвони берилиши каби кўринишидан арзимасдек бир хабарни ўзаро рақобатдаги икки гуруҳ, бир томондан Мирзиёев, бошқа томондан Иноятов-Абдуллаев бошқараётган тўдалар ўртасидаги кескинлашаётган кураш фонида кўриш керак. «Миромонич» оиласига қарши компромат тўплаган ДХХ раиси биринчи ўринбосари Жаҳонгир Эгамовнинг яқинда ҳибсга олинишига ҳам айни контекстда кўриб чиқиш қараш талаб этилади.

Кураш натижасини эҳтимол армиянинг кимнинг тарафига оғиши ҳал қилиши мумкин. Шу боис, Мирзиёев тезликда ҳарбийлар садоқатига эришиш чораларини кўрмоқда. Хуллас, унвон тарқатишдан ташқари шу кунларда у ҳарбийларга минглаб квартиралар бериш ва уларнинг фарзандлари ОЎЮларига кириши учун 700 та грант ажратиш тўғрисидаги иккита фармонни ҳам имзолади. Аскарлар орасидан обрў излаш учун яққол ҳаракат. Бу ёрдам берадими? Ахир вазирни унинг ўзи тайинлаганди-ку? Ўзига садоқатлисини танламаганмиди? Бунинг ҳаммаси шунчаки эмас. Миср ва Чилини унутмайлик, айни давлатларда юқори мансабларга кўтарилган генераллар ўзларини тайинлаганларга қарши фитна уюштиришган эди.

Кўринадики, ҳар иккала томон ҳам ўта коррупциялашган. Бироқ муайян фарқлар мавжуд: агар ҳокимиятни Иноятов-Абдуллаев тўдаси қўлга олса, у ҳолда янги “жаслиқ”ларни четлаб ўтиб бўлмайди. Агар Мирзиёев ғалаба қозонса, гарчи мамлакат мафиялашганича қолса-да, либераллашув томон айрим ўзгаришларга йўл очилади. Яъни ёмон ва жуда ёмонни – “гулаг+мафиялашган режим” ва шунчаки “мафиялашган режим”дан бирини танлашга тўғри келади».

Алишер Илҳомов
Фейсбукдаги саҳифасидан