Asosiy mavzular
16 dekabr 2016

Siyosiy hushyorlik – uzoq yashash sirlaridan biri

“Xalq bilan fikrlashgan odam kam bo‘lmaydi”, deya mulohaza qildi “O‘zbekiston ovozi” gazetasi (13.12) saylangan prezident Shavkat Mirziyoevning 2017 yilni “Xalq bilan muloqot va inson manfaatlari yili”, deb e'lon qilish ortidan.

“Mahalliy hokimlarning xalq oldida hisobot berishi, deputatlar va senatorlarning joylardagi muammolarni izchil o‘rganishi odamlarni o‘ylantirib kelayotgan muammolarga yechim topishda, vakillik hokimiyati va ijro hokimiyatining bir-biriga muvofiq holda faoliyat yuritishida, inson manfaatlarining ishonchli himoya qilinishida muhim ahamiyat kasb etadi”, deb yozdi gazeta.

O‘zbekiston nashrlari bu haqda ilgari ham xuddi shu so‘zlarni qo‘llagan holda ko‘p va xo‘p yozgan. Lekin xalq o‘z taqdirida bu o‘zgarishlarni his qildimi? Yo‘q, albatta. Unda marhum prezident davridan qolgan bu quruq aravani yana sudrashdan ne naf? Bu teshik tog‘ora haqidagi naqlni eslatmayaptimi sizga?

Garchi yangi prezident hokimiyat xalqdan uzoqlashib ketganini ochiq aytganiga qaramay, gazeta bu haqda ochiq yozish mas'uliyatini o‘z zimmasiga olishni istamagan. Buning o‘rniga muammoning ildizini sovet zamoniga olib borib taqashga uringan.

“Ochig‘i, sovet zamonida xalqimiz osmono‘par shiorlardan, “qizil” gaplarlardan charchab, bezib ketgan. Odamlar hozir aniq vazifa, aniq maqsad, boshqacha aytganda, aniq savolga javob kutyapti”, deydi nashr.

Gazeta hokimiyatning xalq bilan yaqinlashuvdan qochganligini sovet zamoniga borib ulaganiga bir sabab bor. Bechora nashr yaqin o‘tmishimizda, Karimov davrida shunday bo‘lganini ochiq ayta olmaydi. Chunki yangi yurtboshi eskisining yo‘lini davom ettiraman, deb aytib qo‘ygan.

Yangining gapiga qarshi gap aytish esa ular uchun o‘lim bilan barobar. Siyosiy hushyorlik uzoq yashash sirlaridan biri, deb biladi gazeta noshirlari.

Buni yaxshi tushunadigan gazeta xalq bilan muloqot qilish zarurati nisbatan amalda yangi prezident davridan anglana boshlaganini xaspo‘shlashga urinadi.

“Oxirgi yillarda mahalliy hokimiyat mutasaddilari bilan o‘tkazilayotgan ochiq muloqotlar bu borada muhim qadam bo‘ldi”, deydi gazetada chop etilgan maqola muallifi.

Birodar, marhum prezident xalq bilan muloqotdan chekinib, mavjud hokimiyatning taxtini omonat qilib qo‘ygani uchun yangi rahbarlar shunga majbur bo‘ldi, deb ochiq aytishga kuch qayda bularda?!

“Xalq istagi – ezgu, xalq istagi – haqiqat”, deya xulosa qiladi gazeta. Bu gaplarni xalq biladi. Aslida bunday emasligini ham biladi. Mazkur haqiqatni amaldagi hokimiyat ham anglab yetganda edi, biz bugun bu gaplarni yozib o‘tirmagan bo‘lar edik.

Shuningdek, “O‘zbekiston ovozi” Oliy Majlis Senatida “Korruptsiyaga qarshi kurashish to‘g‘risida”gi qonun muhokamasi to‘g‘risida ham material chop etib, unda XDPdan saylangan deputatlarning fikrini keltirib o‘tgan.

Deputatlar O‘zbekiston shu paytgacha korruptsiyaga qarshi kurashish borasidagi bir qator xalqaro konventsiyalarga qo‘shilganini eslatar ekan, yangi qonun bu boradagi qonunchilikni yanada takomillashtirishga xizmat qilishini ta'kidlagan.

Ammo ular mazkur illat O‘zbekistondagi butun hokimiyat tizimlarini qamrab olgani, uning jamiyatga yetkazayotgan zararini baholash masalasida biror og‘iz gapirishga “iymagan”. Bu “iymanuvchanlik” ortidan ularning korruptsiyaga qarshi kurashish borasida biror ish qilishiga ham shubha uyg‘onadi.

Bahodir Sharif
O‘zbekistonlik gazetxon tahallusi
Eltuz.com

Tag‘in o‘qing
11 aprel 2015
Qudrat Bobojon Ular, prezident Karimov nafratlangani va dangasalar deya atagani, ularni ovlashgan, lagerlarga, keyinchalik qaytish chiptasi evaziga mehnatga majbur ...
8 sentyabr 2017
O‘tgan oyda MTRKda ro‘y bergan voqealar Bulgakovning “It yurak” qissasi qahramoni professor Preobrajenskiyning mashhur gapini eslatadi. “Fan hali hayvonni ...
25 iyul 2016
Birinchi vidik rasmini ko‘rganimda fizika matematikaga moslashgan maktabning ikkinchi sinfida o‘qirdim. “Radio” degan jurnalning 1967 yilgi ikkinchi sonini xozir ...
1 mart 2019
Assalomu alaykum. Bugungi va'zni qo‘shiq bilan boshlasam. Mard yigit mehmonga ko‘ksini ochibnomardni mehmondan qochishin go‘ring… Bu qo‘shiq matnini 18-asrda ...
Bloglar
18 yanvar 2021
Bor ekanda yo‘q ekan, och ekanda to‘q ekan, yaqin-yaqin zamonlarda yot bosqinchilarning yuz yildan ko‘proq ...
13 yanvar 2021
Kun.uz professionallarni ishga qabul qilar emish. Katta maosh, ikki mahal ovqat. Sihatgohning o‘zi-ya! Bunday ishxonani ...
11 yanvar 2021
Taniqli shoir Bahrom Ro‘zimuhammad 60 yoshda Bahrom aka indamaygina oltmishga kiribdi. Botinan qaralganda, unday emas. ...