O‘zbekistonda Eltuzdan boshqa muxolif saytlar bir ochib yopildi

28 dekabr kuni kechqurun, O‘zbekistonda ochilmayotgan Farg‘ona.ru, Ozodlik, Amerika ovozi, Bi Bi Si, O‘zbekiston xalq harakati kabi saytlardan to‘siq olib tashlandi. Biroq kelasi kuni bu saytlar tag‘in mahalliy provayderlar tomonidan to‘sib qo‘yildi.

Ayni paytda Eltuz sayti bu jarayon davomida to‘silganicha qoldi.

«Eltuz saytiga qo‘yilgan to‘siqning olinmagani ehtimol unda aks etgan achchiq satira bilan bog‘liqdir, ularni kalaka qilishlaringiz yoqmayotgandir», dedi Eltuzning doimiy muxlislaridan biri.

29 dekabr kuni o‘zbekistonlik jurnalist Aleksey Voloseevich: «Tamom, hursandchilik tugadi, hammasini tag‘in bloklab qo‘yishdi», deya bildirdi.

Mustaqil saytlardan to‘siqlarning olib tashlanishi vaqti-vaqti bilan yuz bermoqda.

Garchi to‘siqlar olib tashlanishining haqiqiy sababi noma'lum qolayotgan bo‘lsada, ijtimoiy guruhlarda, bu voqeani o‘zbek internet foydalanuvchilari orasida mustaqil medianing ommaviyligini o‘rganish bilan bog‘liq tadbir ekani haqida fikrlar bor.

O‘zbek hukumati esa tsenzura ostidagi saytlarning to‘sib qo‘yilganini inkor etadi.

13 dekabr kuni Venada o‘tgan Yevropada havfsizlik va hamkorlik tashkiloti anjumanida O‘zbekiston parlamentining axborot bo‘yicha qo‘mitasi raisi Ilhom Abdullaev shunday dedi:

«O‘zbekiston respublikasida hech bir sayt to‘sib qo‘yilmaydi. Axborot olish bilan bog‘liq qandaydir harakat yoki qaror yuz beradigan bo‘lsa, bu faqat amaldagi qonunchilik, sudlarning tegishli qarori asosida amalga oshadi».

Bu iddao hech bir asosga ega emas, chunki mustaqil saytlarga to‘siq qo‘yish uchun hech qanday sudlarning qarori yo‘q.

Eltuz.com