Asosiy mavzular
2 oktyabr 2020

“Eltuz»ning o‘zini yoqqan xotin haqidagi maqolasi ortidan prokuratura jinoyat ishi ochdi

«Eltuz»da e'lon qilingan maqola ortidan Namangan shahri prokuraturasi mulozimlar oldida o‘ziga o‘t qo‘ygan 35 yashar Gulandom Dedaboevaning o‘limi yuzasidan jinoyat ishi ochdi.

Bu haqda O‘zbekiston Bosh prokuraturasi xabar berdi.

Xabarga ko‘ra, Namangan shahri prokuraturasi Jinoyat Kodeksining 103-moddasi (o‘zini o‘zi o‘ldirish darajasiga yetkazish) 1-qismi bilan jinoyat ishi ochgan.

MIB Namangan shahri bo‘limi davlat ijrochisi va Namangan shahri IIB FMB 2-IIB HPG TP profilaktika inspektori harakatlari yuzasidan xizmat tekshiruvlari tayinlangan.

O‘zini yoqayotgan ayol

Nima bo‘lgan edi?

«Eltuz» nashri 1 oktyabr kuni MIB ijrochilari oldida o‘zini yoqqan ayol kasalxonada vafot etgani haqida yozgan edi.

Tanasining 90 foizi kuygan 35 yoshar Gulandom 30 sentyabr kuni Namangan viloyati tibbiyot markazida olamdan o‘tgan edi.

Namangan shahrining Bog‘i Eram ko‘chasida istiqomat qilgan Gulandom Dedaboeva 29 sentyabr kuni MIB ijrochilari harakatiga isyon sifatida ular oldida ustiga benzin sepib o‘zini yoqib yuborgandi.

Bu «isyon» kadastri bo‘lmagan uyni bo‘shatish talabi ortidan yuzaga chiqqani aytildi.

“Eltuz” muxbiri marhumaning onasi Muhabbat Dedaboeva bilan bog‘landi. Suhbatdosh voqea qay tarzda ro‘y berganini batafsil so‘zlab berdi. Bundan tashqari, “Eltuz” muxbiri voqea aks etgan bir soatlik videotasvir bilan tanishib chiqdi.

O‘zini yoqqan ayolning onasi Muhabbat Dedaboevaga ko‘ra, hodisa 29 sentyabr kuni chamasi soat 13:00 larda yuz bergan. Majburiy ijro byurosi va IIB xodimlari xonadonga keladi hamda ulardan uyni bo‘shatishlarini talab qiladi.

«Ushbu hol ko‘p bora bo‘lgan», dedi suhbatdosh.

Gulandom Dedaboeva bu safar mutasaddilarga: “Uyga tomon yursalaringiz, o‘zimni yoqib yuboraman, uyni “falon so‘mga sotib olganman, o‘sha pulni bersin loaqal”, deya shart qo‘yadi.

Murosasiz tortishuvlardan so‘ng Gulandom Dedaboeva qo‘lidagi yoqilg‘ini ustiga, sepib o‘zini yoqib yuboradi. Diydasi qattiq IIB xodimlari yonayotgan ayolga yordam berish o‘rniga undan qochadi.

Ayol yon-atrofdagilar ko‘magida bir amallab o‘chiriladi. Tez yordam mashinasida shifoxonaga olib ketiladi. Voqea shu hodisa bilan tugaydi.

Tahririyatimizga taqdim etilgan videoda qo‘shnilarning halokatdan so‘ng yig‘lab shovqin solgani, MIB va IIB xodimlariga tosh otib, hokimlikni la'natlagani aks etgan…

Gulandom Dedaboeva 90 foiz kuyish xulosasi bilan davolanishga yotqiziladi. Jarohat o‘ta og‘ir deb baholanadi. Shifoxonaga yotqizilgandan 10 soat vaqt o‘tib (soat 00:30 larda) joni uzilgan.

Gulandom Dedaboeva ikki farzandi va onasi bilan istiqomat qiladigan uyini 13 ming AQSh dollariga sotib olgan edi. Uy onasi Muhabbat Dedaboeva nomiga rasmiylashtirilgan. Biroq uy qurilgan yer kadastrida muammo bo‘lgan. Uyni sotgan fuqaro bu muammoni oxirigacha hal qilib bermagan.

Natijada viloyat hokimining uy-joy kadastri to‘g‘risidagi qaysidir qaroriga muvofiq, uy Muhabbat Dedaboevaga tegishli emas deb topilgan. So‘ng ijrochilar tomonidan tegishli tartibda uy bo‘shatilishi so‘ralgan.

“Eltuz” muxbiri viloyat MIB vakili bilan bog‘landi. Xodimning aytishicha, ushbu tortishuv ikki yildan buyon yechimini topmagan. Dadaboevalar istiqomat qilishda davom etgan va qonunlarga bo‘ysunmagan. Fojeadan so‘ng ushbu jarayon yopilishi yoki uyni tortib olish qay tartibda kechishi ma'lum emas.

Videotasvirlarni diqqat bilan ko‘rish chog‘ida ayolning ruhan sog‘lom ekanini sezish mumkin. U o‘zini yoqishni, natija bunday yakun topishni xohlamagan, bor-yo‘g‘i atrofdagilarga ta'sir ko‘rsatmoqchi bo‘lgan. Ayolni tinchlantirib, qo‘lidagi yoqilg‘ini olib qo‘yolmagan xodimlar va qo‘shnilarning katta xatosi tufayli voqea ayanchli yakun topdi.

Natijada kim ziyon ko‘rdi? Uy muammosi kasalmand onani qizidan, hali balog‘at yoshiga yetmagan ikki yigitni onasidan ayirdi…

Bosh prokuratura huzuridagi Majburiy ijro byurosi tashkil etilganiga hali ko‘p bo‘lmadi. Bundan oldin ham MIB xodimlari faoliyatini bajarayotgani vaqtda shunga o‘xshash ko‘plab hodisalar sodir bo‘lgan.

Qashqadaryoda ayol o‘zini yoqib yuborgan, surxondaryolik ayol bolta ko‘tarib chiqqan, ko‘plab tadbirkorlar o‘z joniga qasd qilmoqchi bo‘lgani haqida o‘zbek mahalliy elektron nashrlari e'lon qilgan edi.

Eltuz.com

Tag‘in o‘qing
22 oktyabr 2021
Hafta o‘tib yana siz bilan ko‘rishish nasib etdi. Mag‘rursiz, masrursiz va orangizda hayotga maftun, sevgidan majnun kishilar bor.   Bugun men 24 ...
14 fevral 2017
O‘zbekiston poytaxti Toshkent va boshqa shaharlarida, o‘tgan yili, taniqli qo‘shiqchilar tashkil qilib kelgan “Sevishganlar kuni” nomli kontsertlar to‘xtatib qo‘yilgandi. ...
5 oktyabr 2016
4 oktyabr kuni o‘z onasiga nolalari tarzida bitilgan maktubida Gulnora Karimova ekani iddao qilinayotgan Afina@zabitaya1972 akkaunti egasi uch yillik ...
9 aprel 2023
Salom qadrli muhlislar. Eltuz portaliga kelgan navbatdagi 5 ta shikoyatni o‘qib eshittiramiz. Maktublar O‘zbekistonning Camarqand, Xorazm, Toshkent va Surxondaryo ...
Bloglar
14 fevral 2024
«Yoshlar» telekanalida sodir bo‘layotgan korruptsiya oldida «Sport» telekanali direktori Zohid Karimov qo‘y og‘zidan cho‘p ololmaydigan ...
13 fevral 2024
Tarmoqning o‘zbek segmenti o‘zbek davlat ramzlariga nafratni parvarishlamoqda. Ijtimoiy tarmoqlarda mahalla raisi va faollarning davlat ...
11 yanvar 2024
Qirg‘iziston parlamenti kecha, ya'ni 10 yanvarda ko‘pchilik ovoz bilan deputat Emil Jamg‘irchievni jinoiy javobgarlikka tortishga ...