Kinopublitsist Abdulaziz Mahmudov olamdan o‘tdi

Taniqli kinopublitsist Abdulaziz Mahmudov og‘ir xastalikdan so‘ng  8 may kuni 71 yoshida Toshkentda vafot etdi. Bu haqda Eltuzga uning singlisi xabar berdi.

O‘z zamonasoz kasbdoshlaridan farqli Abdulaziz Mahmudov 1980 yillar oxiri va 1990 yillar boshidagi mustaqillik uchun kurash aks etgan real voqealarni videotasvirga olishga muvaffaq bo‘lgan kamgina shaxslarning biri edi.

Abdulaziz Mahmudov o‘z kamerasi orqali 1989 yilning yozida Farg‘onada turk mesxetilari bilan mahalliy o‘zbeklar o‘rtasidagi yuz bergan qonli voqealar; endigina jabhalana boshlagan va hukumat bosimiga uchragan norasmiy harakatlar va shaxslar hayoti; muxolifatdagi “Birlik” va “Erk” partiyasining tuzilishi kabi siyosiy voqealarni aks ettirgan edi.

Shuningdek, Mahmudov rasman “O‘zbekkinoxronika”, “O‘zbekfilm” kinostudiyalarida kinodramaturg va rejissyor bo‘lib faoliyat ko‘rsatgan. O‘zbekiston Kinomatografistlar uyushmasining a'zosi bo‘lgan.

Eltuz jamoasi Abdulaziz Mahmudovning yaqinlariga o‘z ta'ziyasini bildiradi.